لکھنؤ: رمضان ہیلپ لائن نمبر کا افتتاح، خواتین کے لیے تراویح کا خصوصی انتظام

Ramazan Mubarak رمضان المبارک کے پیش نظر مسلم پرسنل لاء بورڈ کے رکن مولانا خالد رشید فرنگی محلی نے اعلان کرتے ہوئے کہا کہ عیش باغ عید گاہ میں خواتین کے لیے تراویح کا خصوصی اہتمام کیا گیا ہے، عشاء کی اذان 7:45 پر ہوگی جبکہ عشاء کی جماعت 8 بجے ہوگی۔

لکھنؤ: رمضان المبارک کے آمد کے پیش نظر مسلم پرسنل لاء بورڈ کے رکن، عیش باغ عیدگاہ کے شاہی امام مولانا خالد رشید فرنگی محلی نے ایک اہم اعلان کرتے ہوئے کہا کہ 11 مارچ کو تمام لوگوں سے اپیل ہے کہ چاند دیکھنے کا اہتمام کریں، اگر چاند 11 مارچ کو نظر آتا ہے تو اسی دن سے تراویح شروع ہو جائے گی۔

اس حوالے سے انہوں نے کہا کہ عیش باغ عیدگاہ میں خواتین کے لیے تراویح کا خصوصی اہتمام کیا گیا ہے، عشاء کی اذان 7:45 پر ہوگی جب کی عشا کی جماعت 8 بجے ہوگی۔

انہوں نے کہا کہ رمضان المبارک میں ہم سبھی کو چاہیے کہ زیادہ سے زیادہ عبادت کریں، غریبوں کی مدد کریں اور زکوۃ کے پیسے کو صحیح جگہ پہنچائیں۔ انہوں نے رمضان المبارک کے تعلق سے ایڈوائزری بھی جاری کی ہے اور سبھی مسلمانوں سے اپیل کیا ہے کہ رمضان المبارک میں زیادہ سے زیادہ عبادت کریں دعا اور استغفار کریں۔

انہوں نے رمضان ایڈوائزری میں کہا ہے کہ روزہ اور دیگر عبادات کے صحیح ہونے کے لیے مسائل کا جاننا ضروری ہے۔ اس کے بغیر خدا کی عبادت کا حق ادا نہیں ہو سکتا۔ قرآن پاک میں اہل ایمان کو کہا گیا کہ اگر تم کسی چیز کے بارے میں نہیں جانتے تو اہل علم سے پوچھ لو۔

ان خیالات کا اظہار ناظم دارالعلوم فرنگی محل مولانا خالد رشید فرنگی محلی امام عیدگاہ لکھنؤ اور چیئرمین اسلامک سنٹر آف انڈیا نے آج دارالعلوم فرنگی محل میں "رمضان ہیلپ لائن" کے افتتاح کے موقع پر کیا۔ انہوں نے کہا کہ اسلامک سنٹر آف انڈیا کے تحت رمضان ہیلپ لائن سال 2002 میں حضرت مولانا احمد میاں فرنگی محلی کی نگرانی میں قائم کی گئی تھی۔

اس کی خصوصیت پر روشنی ڈالتے ہوئے انہوں نے کہا کہ رمضان کی اہمیت کے ساتھ ساتھ روزے، زکوٰۃ، تراویح، افطار، سحری، نماز اور دیگر مسائل سے متعلق سوالات پوچھے جاتے ہیں۔ توقع ہے کہ اس سے لوگوں کو بڑے پیمانے پر فائدہ ہوگا۔ انہوں نے کہا کہ یہ رمضان ہیلپ لائن اپنے قدیم طریقے کے مطابق کام کرے گی۔

مولانا نے مزید کہا کہ یہ ہیلپ لائن ملک کی ایک منفرد ہیلپ لائن ہے۔ اس کا قیام عام مسلمانوں کی مذہبی رہنمائی کے لیے کیا گیا ہے۔ اللہ کا شکر ہے کہ اسے بہت شہرت ملی۔ انہوں نے بتایا کہ اس ہیلپ لائن پر لوگ روزے، نماز، زکوٰۃ، صدقہ، فطرہ اور دیگر شرعی مسائل سے متعلق سوالات کرتے ہیں، جن کے جوابات علماء کرام کا پینل دیتا ہے۔ ملک کے دوسرے حصوں اور یہاں تک کہ بیرون ملک سے بھی کال اور میل کرتے ہیں۔

انہوں نے کہا کہ یہ صرف اللہ تعالیٰ کے فضل و کرم اور علمائے فرنگی محل کی بے مثال قربانیوں کا نتیجہ ہے جو آج بھی جاری ہے اور بڑی تعداد میں لوگ اس سے مستفید ہو رہے ہیں۔

یہ ہیلپ لائن یکم رمضان المبارک سے دوپہر 2 بجے سے شام 4 بجے تک کام کرے گی۔ اس ہیلپ لائن سے درج ذیل موبائل نمبرز، ای میل اور واٹس ایپ پر رابطہ کیا جا سکتا ہے۔۔۔۔۔9415023970, 9335929670, 9415102947, 7007705774, 9140427677
ویب سائٹ www.farangimahal.in‏
ای میل، ramzanhelpline2005@gmail.com‏