امتیاز کریمی مدرسہ بورڈ کی ماہرین کمیٹی کے چیئرمین نامزد - Imtiaz Karimi Nominated as Chairman

Imtiaz Karimi has been nominated as Chairman: بہار مدرسہ ایجوکیشن بورڈ کی کمیٹی کی تشکیل ہوئی ہے۔ اس کمیٹی کا کام بورڈ کے نصاب کا تجزیہ اور نئی تعلیمی پالیسی کے تحت نیا نصاب مرتب کرنا ہے۔ اس کے چیئرمین بی پی ایس سی کے سابق رکن امتیاز کریمی بنائے گئے ہیں۔

گیا:بہار اسٹیٹ مدرسہ ایجوکیشن بورڈ کے نصاب کا تجزیہ اور نئی تعلیمی پالیسی کے تحت نیا نصاب مرتب کرنے کے لیے پانچ رکنی کمیٹی کی تشکیل کی گئی ہے۔ بی پی ایس سی کے سابق ممبر امتیاز احمد کریمی کو مدرسہ بورڈ کی اس ماہرین پر مشتمل کمیٹی کا چیئرمین بنایا گیا ہے۔ نصاب سے متعلق ماہرین کمیٹی اپنی رپورٹ اگلے ایک مہینے میں ریاست کی حکومت کو سونپے گی۔ ایڈیشنل سیکرٹری محکمۂ تعلیم سنجے کمار کے دستخط سے جاری نوٹیفکیشن کے مطابق مذکورہ کمیٹی مدارس کے موجودہ نصاب کا تجزیہ کرے گی اور نئی تعلیمی پالیسی کے مطابق مدارس کے نصاب میں عصری تقاضے کے تحت سائنس اور جدید مضامین کو شامل کرنے کی سفارش کرے گی۔

مدارس کے نصاب میں کمیٹی ووکیشنل کورسز کو شامل کرنے کی سفارش بھی کرے گی۔ نصاب سے متعلق کمیٹی اپنی رپورٹ ریاستی حکومت کو ایک مہینے کے اندر سونپ دے گی۔ اس کا مقصد بہار میں مدرسے کی تعلیم کو معیاری بنانے کے ساتھ عصری تعلیم سے منسلک کرکے مدارس کو ماڈرن شکل دینا ہے تاکہ اس بورڈ سے پڑھنے والے طلباء بھی اپنی تعلیمی صلاحیت سے آگے بڑھیں۔ چیئرمین امتیاز کریمی کے علاوہ اس کمیٹی میں ڈاکٹر سید عبدالمعین، ڈاکٹر گیا ندیمونی، ڈاکٹر امتیاز عالم اور ڈاکٹر محمد انیس الرحمٰن کے نام بھی شامل ہیں۔