معذوروں کے لیے گھر پر ووٹ ڈالنے کے انتظامات - Lok Sabha election 2024

Gaya DM Reaction گیا پارلیمانی حلقہ میں 275 چلنے پھرنے یا پھر جسمانی طور پر معذور ووٹروں کے لیے ان کے گھروں میں ہی ووٹنگ انتظامات کرائے جائیں گے۔اس میں دونوں طبقے ہندو مسلم کے ووٹرز ہیں۔ گیا پارلیمانی حلقہ سے کل 14 امیدوار انتخابی میدان میں ہیں۔

گیا:ریاست بہار کے گیا پارلیمانی حلقے سے کل 14 امیدوار اپنی قسمت آزما رہے ہیں۔ دو مارچ کو سبھی آزاد امیدواروں کو بھی ان کے انتخابی نشان جاری کر دیے گئے ہیں۔ دو مارچ کو نام واپس لینے کی آخری تاریخ تھی۔اس کے تحت ایک امیدوار نے گیا پارلیمانی حلقے سے اپنا نام واپس لے لیا ہے۔ قابل ذکر ہے کہ گیا پارلمانی حلقے سے کل 22 امیدواروں نے پرچہ نامزدگی داخل کیا تھا۔ جن میں سات امیدواروں کے کاغذات میں کمی ہونے کی وجہ سے ان کے پرچہ نامزدگی کو رد کر دیا گیا تھا۔

باقی 15 امیدواروں میں آج ایک امیدوار نے اپنا نام واپس لے لیا ہے۔ اب 14 امیدوار گیا پارلیمانی حلقے سے اپنی قسمت آزما رہے ہیں۔ اس میں آر جے ڈی سے اُمیدوار کمار سروجیت اور ہندوستانی عوام مورچہ سیکولر سے جیتن رام مانجھی ہیں جبکہ ان کے علاوہ بہوجن سماج پارٹی، دی نیشنل روڈ میپ پارٹی آف انڈیا، لوک تانترک سماجوادی پارٹی، بھارتیہ لوک چیتنا پارٹی، راشٹریہ جن سنبھاونا پارٹی کے امیدوار کے علاوہ بقیہ آزادامیدوار ہیں جنہیں انتخابی نشان جاری کر دیا گیا ہے۔

اس حوالے سے ضلع الیکشن افسر و ڈسٹرکٹ مجسٹریٹ ڈاکٹر تیاگ راجن نے پریس کانفرنس میں جانکاری دیتے ہوئے کہا کہ نام واپسی کی تاریخ کے تحت آج ایک امیدوار نے اپنا نام واپس لیا ہے۔ سبھی امیدواروں کے انتخابی نشان الاٹ کر دیے گئے ہیں۔ ضلع میں انتخاب کی تیاریاں آخری مرحلے میں ہیں۔ تمام سیل کے ذریعے ہر دن تیاریوں کا جائزہ لیا جا رہا ہے۔ ساتھ ہی انہوں نے کہا کہ رائے دہندگان اپنے حق کا استعمال کریں اس کے لیے بڑے پیمانے پر تشہیری مہم چلائی جا رہی ہے۔

خاص طور پر ان نوجوانوں کے درمیان حق رائے دہی کی اہمیت پر ان کو جانکاری سے واقف کرایا جارہا ہے جو پہلی مرتبہ ووٹر بنے ہیں اور پہلی بار وہ اپنے امیدوار کے لیے ووٹ کریں گے۔ اس کے علاوہ انہوں نے کہا کہ جن بزرگوں اور معذوروں کے ذریعہ گھر پر ہی ووٹ ڈالنے کے لیے درخواست دی گئی ہے، ان میں جن کی درخواست اور ان کی معذوری درست پائی گئی ہے ان کے لیے ان کے گھر پر ووٹنگ کے انتظامات کرائے جا رہے ہیں تاکہ وہ اپنے حق کا استعمال کرسکیں۔

واضح ہو کہ گیا ضلع میں تین پارلمانی حلقے آتے ہیں، ان میں جہان آباد پارلمانی حلقہ کے تحت ضلع گیا کا اتری اسمبلی حلقہ ہے جبکہ اورنگ آباد پارلیمانی حلقے میں گروا، امام گنج اور ٹکاری اسمبلی حلقہ ہے جبکہ گیا پارلیمانی حلقے میں شیر گھاٹی، بارہ چٹی، بودھ گیا، گیا ٹاؤن ، بیلا گنج اور وزیر گنج اسمبلی حلقہ شامل ہے۔

پہلی بار 32478 ووٹ کریں گے

گیا پارلیمانی حلقہ میں پہلی بار ووٹ ڈالنے والوں کی خاصی تعداد ہے۔ ضلع الیکشن آفیسر نے بتایا کہ اس بار ضلع گیا میں کل 32478 نئے ووٹرز ہیں جن کی عمر 18 سے 19 سال ہے۔ یہ پہلی بار اپنے حق کا استعمال کریں گے۔ ان میں 20487 لڑکے اور 11990 لڑکیاں ہیں۔ ان کے شناختی کارڈ بھی جاری کردیے گئے ہیں۔ ڈسٹرک الیکشن آفیسر ڈاکٹر تیاگ راجن نے کہاکہ انکے درمیان بیداری مہم چلائی جارہی ہے تاکہ یہ اپنے حق کا استعمال کریں۔ کالجوں اور یونیورسیٹی میں بھی بیداری مہم چلائی گئی ہے۔

گیا پارلیمانی حلقہ میں 19 اپریل کو ووٹنگ ہوگی۔ اس کی تیاری ضلع سطح پر کی جارہی ہے۔ ڈی ایم نے کہاکہ سماج کے ہرطبقے کے معززین سے بھی ووٹ فیصد بڑھانے کے لیے بیداری مہم چلانے پر زور دیا گیا ہے تاکہ ضلع میں ووٹنگ فیصد زیادہ سے زیادہ ہو ۔