گیا: خانقاہ کریمیہ میں 20 فروری سے چار روزہ عرس کا آغاز

Four-day Urs in Gaya: بیتھو شریف میں واقع خانقاہ کریمیہ میں 20 فروری سے سالانہ عرس کی تقریب منعقد ہوگی۔ اس میں طرحی مشاعرہ، محفل سماع، صوفیوں کی روایت کے تحت قوالی، سمینار اور جلسہ سیرت النبی کی محفل منعقد ہوگی۔

گیا:ریاست بہار کے ضلع گیا کے بیتھو شریف میں واقع خانقاہ چشتیہ نظامیہ اشرفیہ درویشیہ کریمیہ کے زیر اہتمام سالانہ عرس انتہائی تزک واحتشام کے ساتھ 20 فرورہ سے منعقد ہوگا۔ چار روزہ سالانہ عرس کی تیاریاں مکمل کرلی گئی ہیں۔ آج خانقاہ چشتیہ نظامیہ اشرفیہ درویشیہ کریمیہ کے سجادہ نشیں حضرت سید شاہ غفران اشرفی نے اسکی اطلاع دی۔

انہوں نے بتایا کہ خانقاہ کریمیہ کی جانب سے جو حضرت مخدوم درویش اشرف رحمة اللہ علیہ اور دیگر بزرگوں کا عرس ہوتا ہے وہ اس برس 20 فروری کو بعد نماز فجر سے شروع ہوگا۔ عرس میں بڑی تعداد میں مریدین متوسلین وعقیدت مند پہنچتے ہیں۔ انہوں نے بتایا کہ بیس فروری کو بعد نماز فجر سے قرآن خانی کا سلسلہ شروع ہوگا، جو ظہر نماز سے قبل تک چلتا رہے گا اور بعد نماز ظہر سیرت النبی صلی اللہ علیہ وسلم کا اہتمام ہوگا۔ جس میں ملک کے نامور علما اور شعرا کی شرکت ہوگی جبکہ عصر کی نماز کے بعد منقبتی طرحی مشاعرہ اور قوالی ہوگا۔

بعد نماز مغرب محفل سماع کا اہتمام ہوگا اور اکیس فروری کو بھی اسی طرح پروگرام ہونگے، صبح میں قرآن خوانی، اسکے بعد سیرت النبی کا جلسہ اور محفل سماع ہوگا۔ جبکہ بائیس فروری صبح سے قرآن خانی ہوگی جو دس بجے دن تک ہوگی۔ اسکے بعد ایک سیمینار ہوگا جس میں سیرت النبی کے علاوہ دیگر موضوع پر اپنا مقالہ پیش کریں گے۔

اس کے بعد بزم کہکشاں کے زیر اہتمام طرحی منقبتی مشاعرہ بھی ہوگا اور اسکے بعد قوالی ہوگا، خانقاہ کریمہ سے مخدوم درویش کی بارگاہ میں چادر پوشی کے لیے سجادہ نشیں سید شاہ غفران اشرفی کی قیادت میں جلوس نکلے گا، جہاں آستانہ پر پہنچ کر چادر پوشی کی جائے گی اور اسکے بعد فاتحہ اور درود وسلام کا نذرانہ پیش کیا جائے گا، واپسی کے بعد حسب پروگرام اور عام لنگر کا اہتمام ہوگا اور اس کے بعد خانقاہ کے صوفیوں کی روایت کے مطابق تقریب ہو گی۔

واضح ہوکہ خانقاہ کریمیہ ضلع کی ایک قدیم اور معروف خانقاہ ہے اور ہر برس یہاں خانقاہ میں عرس کا اہتمام ہوتا ہے۔ غفران اشرفی بہار کے بڑے اور معتبر بزرگ شاعروں میں سے ایک ہیں۔ یہاں وہ عرس کے موقع پر اردو کے فروغ اور شاعروں و ادیبوں کی حوصلہ افزائی کیلئے بھی ایک خاص تقریب کا انعقاد کرتے ہیں۔ اُنہوں نے بتایا کہ تئیس فروری بروز جمعہ کو بھی پروگرام ہوگا جس میں کئی بزرگوں کی مزارات پر چادر پوشی ہوگی اور اس دن اردو کی خدمات انجام دینے والے افراد کو اعزاز بخشا جائے گا۔