بھارتی مسلمانوں کی سب سے بڑی تنظیم میں بڑے پیمانے پر خواتین کی انٹری

بھارت میں مسلمانوں کی سب سے بڑی ملی تنظیم جمعیت علمائے ہند کی ممبر سازی مہم میں ہزاروں خواتین نے شمولیت اختیار کی۔

مظفر نگر:ملک کی سب سے بڑی ملی تنظیم جمعیت علمائے ہند میں بڑے پیمانے پر مسلم خواتین کی شمولیت شروع ہوگئی ہے۔ جمعیت علماء ہند کے قومی صدر مولانا محمود مدنی کی رہنمائی میں 25 فروری کو اترپردیش کے مظفر نگر ضلع میں ایک ممبر سازی کیمپ کا انعقاد کیا گیا جس میں ہزاروں مسلم خواتین کو جمعیت علماء ہند کا رکن بنایا گیا۔

مغربی اتر پردیش کے ضلع مظفر نگر کے محلہ محمود نگر میں تنظیم جمعیت علمائے ہند نے ممبر سازی مہم چلا کر پہلے ہی دن دو ہزار سے زیادہ نئے ممبران کا اضافہ کیا۔ دیگر علاقوں میں بھی ممبر شپ مہم میں بڑی تعداد میں مسلم خواتین اور مرد حضرات نے جمعیت علماء ہند کی رکنیت حاصل کی اور جمعیۃ علماء ہند کے کام کو آگے بڑھانے اور تنظیم کو مضبوط کرنے کا عہد کیا۔

قابل ذکر ہے کہ خواتین پہلے سے جمعیت کا رکن رہی ہیں لیکن اس مہم کے تحت تنظیم میں شامل ہو رہی خواتین کی تعداد نمایاں اور قابل ذکر ہے۔

جمعیت علماء ہند کے ریاستی سکریٹری قاری محمد ذاکر نے بتایا کہ جمعیۃ علماء ہند کی جانب سے رحمتیہ مسجد محمود نگر میں رکنیت سازی کے لیے خصوصی کیمپ کا انعقاد کیا گیا جس میں 2000 سے زائد مرد و خواتین نے تنظیم کی رکنیت حاصل کی۔

انہوں نے مزید کہا کہ لوگوں کو تنظیم میں شامل کرنے کی مہم پورے ملک میں تین مارچ تک جاری رہے گی۔ انہوں نے بتایا کہ جمعیت علماء ہند ہر تین سال بعد رکنیت سازی مہم چلاتی ہے اور اس بار تنظیم میں پانچ لاکھ نئے ممبران شامل کرنے کا ہدف مقرر کیا گیا ہے۔ انہوں نے بتایا کہ یہ مہم آن لائن اور آف لائن دونوں طرح چلائی جا رہی ہے۔

اسی کے ساتھ انہوں نے یہ اعلان بھی کیا کہ جو بھی سب سے زیادہ ممبران کو شامل کرے گا اسے 51 ہزار روپے انعام دیا جائے گا اور دوسرے نمبر پر آنے والے کو 31 ہزار روپے کا انعام دیا جائے گا جب کہ تیسرے نمبر پر آنے والے کو بھی انعام سے نوازا جائے گا۔ واضح رہے کہ وزیر اعظم نریندر مودی نے حال ہی میں خواتین کو بااختیار بنانے اور سماج میں ان کی شمولیت پر زور دیا تھا جس کے بعد جمعیت علمائے ہند نے اس مہم کا آغاز کیا ہے۔