نئی دہلی:عام آدمی پارٹی کے قومی کنوینر اور دہلی کے وزیر اعلی اروند کیجریوال نے ایک بار پھر بی جے پی پر عآپ حکومت کو گرانے کا الزام لگایا۔ انہوں نے الزام لگایا کہ پہلے کی طرح بی جے پی ایک بار پھر دہلی میں عام آدمی پارٹی کے ایم ایل ایز کو توڑنے کی کوشش کر رہی ہے۔ عام آدمی پارٹی کے لیڈر اور دہلی حکومت کے وزیر آتشی نے بھی ہفتہ کی صبح پریس کانفرنس کر کے دہلی میں بھی عام آدمی پارٹی کی حکومت گرانے کی بات کی۔ انہوں نے الزام لگایا کہ بی جے پی لیڈر عام آدمی پارٹی کے ممبران اسمبلی سے رابطے میں ہیں۔
آتشی کے اس الزام کے کچھ دیر بعد وزیر اعلی اروند کیجریوال نے خود بی جے پی پر حملہ کیا اور ایکس (سابقہ ٹویٹر) پر پوسٹ کرکے بی جے پی کے آپریشن لوٹس کے بارے میں اپنے خیالات کا اظہار کیا۔ انہوں نے کہا کہ 'حال ہی میں انہوں نے دہلی کے ہمارے سات ایم ایل اے سے رابطہ کیا اور کہا کہ وہ کچھ دنوں کے بعد کیجریوال کو گرفتار کر لیں گے۔ اس کے بعد ہم ایم ایل اے کو توڑ دیں گے۔ 21 ایم ایل اے سے بات چیت ہوئی ہے۔ دوسروں سے بھی بات کریں گے۔ اس کے بعد ہم دہلی میں عام آدمی پارٹی کی حکومت گرائیں گے۔ آپ بھی آ سکتے ہیں۔ 25 کروڑ روپے دیں گے اور بی جے پی کے ٹکٹ پر الیکشن لڑائیں گے۔'
انہوں نے مزید لکھا کہ 'اگرچہ وہ دعویٰ کرتے ہیں کہ انہوں نے 21 ایم ایل اے سے رابطہ کیا ہے، لیکن ہماری جانکاری کے مطابق انہوں نے اب تک صرف سات ایم ایل اے سے ہی رابطہ کیا ہے اور ان سب نے انکار کر دیا۔ اس کا مطلب ہے کہ مجھے کسی شراب گھوٹالہ کی تحقیقات کے لیے گرفتار نہیں کیا جا رہا ہے، بلکہ وہ دہلی میں عام آدمی پارٹی کی حکومت گرانے کی سازش کر رہے ہیں۔ پچھلے نو برسوں میں انہوں نے ہماری حکومت کو گرانے کی بہت سی سازشیں کیں۔ لیکن انہیں کوئی کامیابی نہیں ملی۔'
اس سے قبل دہلی حکومت کی وزیر آتشی نے بی جے پی پر آپریشن لوٹس کے تحت مختلف ریاستوں میں ایم ایل ایز کو خرید کر یا دھمکی دے کر حکومت گرانے کی سازش کا الزام لگایا۔ انہوں نے کہا کہ بی جے پی اب دہلی کے وزیر اعلی اروند کیجریوال کو ای ڈی کے ذریعہ گرفتار کر کے حکومت گرانا چاہتی ہے۔ اس کے لیے بی جے پی عام آدمی پارٹی کے ایم ایل اے کو خریدنے اور توڑنے کی کوشش کر رہی ہے۔ ان کے پاس اس کی ریکارڈنگ بھی ہے جسے وہ وقت آنے پر عام کریں گی۔
وہیں بہار میں نتیش کمار کے بی جے پی کے ساتھ ہاتھ ملانے کے امکان پر آتشی نے کہا کہ بہار میں ہمیں امید ہے کہ جے ڈی یو اور آر جے ڈی کے درمیان چل رہے مسائل جلد حل ہو جائیں گے۔ یہاں بہار سے مختلف معاملہ ہے۔ بی جے پی دہلی میں عام آدمی پارٹی کی منتخب حکومت کو گرانے کی کوشش کر رہی ہے۔ پچھلے کچھ دنوں میں بی جے پی نے عام آدمی پارٹی کے سات ایم ایل ایز سے رابطہ کیا ہے۔ 'بی جے پی نے ان سے کہا کہ ہم اروند کیجریوال کو گرفتار کرنے والے ہیں۔ اس کے بعد ہم ہمارے ایک ایک کر کے ایم ایل اے کو توڑ دیں گے۔ ہم عام آدمی پارٹی کے 21 ایم ایل اے سے رابطے میں ہیں۔ ان کے ذریعے ہم دہلی کی منتخب حکومت کو گرائیں گے۔' آتشی نے الزام لگایا کہ بی جے پی نے ان سات ایم ایل ایز کو بی جے پی میں شامل ہونے کے لیے 25-25 کروڑ روپے کی پیشکش کی ہے۔
انہوں نے کہاکہ بی جے پی یہ آپریشن پہلی بار نہیں چلا رہی ہے۔ ان ریاستوں میں جہاں ان کی حکومت نہیں بنتی ہے، وہ پیسے دے کر، ڈرا دھمکا کر، سی بی آئی اور ای ڈی میں کیس درج کرکے اور ایم ایل ایز کو بہکا کر حکومت گرانے کی کوشش کرتے ہیں۔ بی جے پی نے مہاراشٹر، گوا، کرناٹک، اروناچل پردیش اور مدھیہ پردیش میں کئی بار امیدوار کھڑے کیے ہیں۔ بی جے پی نے دہلی میں بھی دو بار یہ کوشش کی ہے۔ تب بی جے پی نے ہمارے ایم ایل ایز کو توڑنے کی کوشش کی تھی لیکن ہمارے ایم ایل اے نے بی جے پی کے نائب صدر شیر سنگھ ڈگر کا ایک اسٹنگ ملک کے سامنے رکھا تھا۔ 2022 میں، 20 کروڑ روپے دے کر ایم ایل ایز کو خریدنے کی کوشش کی گئی، لیکن بی جے پی کا آپریشن لوٹس دونوں بار ناکام رہا۔ عام آدمی پارٹی کے ایم ایل اے نہ تو بی جے پی کی دھمکیوں سے ڈرتے ہیں اور نہ ہی لالچی ہیں۔
مزید پڑھیں: بہار کی سیاست میں اگلے 48 گھنٹے اہم، مختلف جماعتوں نے بلائی قانون ساز پارٹی کی میٹنگ
آتشی نے مزید کہا کہ اب بی جے پی آپریشن 2.0 چلا رہی ہے، جس میں وہ اروند کیجریوال کو نام نہاد شراب گھوٹالہ میں گرفتار کرنا چاہتی ہے۔ اس کے بعد وہ ایم ایل اے کو ڈرا دھمکا کر اور خرید کر دہلی میں عام آدمی پارٹی کی حکومت گرانا چاہتی ہے۔ پارٹی کے ایم ایل اے دھمکیوں سے نہیں ڈرتے۔ دہلی کے لوگوں نے ہم پر بھروسہ کیا اور ہمیں دو بار کامیاب کیا ہے۔ ہم دہلی کے لوگوں کے لیے دل و جان سے کام کرتے رہیں گے۔ اگر اروند کیجریوال کو جیل میں ڈال دیا جاتا ہے تو دہلی کی تمام سات لوک سبھا سیٹوں پر بی جے پی صفر ہو جائے گی۔
