بی جے پی کا ترنمول کانگریس کے دو امیداروں کی نامزدگی منسوخ کرنے کا مطالبہ - Lok Sabha Election 2024

BJP Reaction On TMC بی جے پی نے الیکشن کمیشن سے رجوع ہوکر ترنمول کانگریس کے دو امیدواروں ملا رائے اور حاجی نورالاسلام کی امیدواری منسوخ کرنے کا مطالبہ کیا ہے۔ بی جے پی نے الیکشن کمیشن سے جلد سے جلد اس ضمن میں کارروائی کرنے کا مطالبہ کیا ہے۔

کولکاتا:مغربی بنگال میں لوک سبھا انتخابات کی گہماگہمی اپنی عروج پر پہنچ گئی ہے۔ تشہیری مہم کے ساتھ ساتھ امیداروں کی نامزدگیوں کا سلسلہ جاری ہے۔ اسی درمیان بی جے پی نے کولکاتا جنوب اور بشیرہاٹ سے ترنمول امیدواروں کی نامزدگی میں سنگین بے ضابطگیوں کا الزام لگایا ہے۔

بی جے پی کے مطابق ترنمول کے ان دو امیدواروں یعنی مالا رائے اور حاجی نورالاسلام کی نامزدگی میں قانون اور انتخابی ضابطوں کی تعمیل نہیں کی گئی۔ اس لئے بی جے پی نے ان دو ترنمول امیدواروں کے کاغذات نامزدگی منسوخ کرنے کا مطالبہ کیا ہے۔ کولکاتا بی جے پی کے جنرل سکریٹری جگن ناتھ چٹرجی نے بدھ کو ایک پریس کانفرنس میں یہ بات کہی۔

انہوں نے یہ بھی کہا کہ بشیرہاٹ حلقے سے بی جے پی کی امیدوار ریکھا پاترا نے الزام لگایا تھا کہ ان کے حلقہ سے ترنمول امیدوار حاجی نورالاسلام 15ویں لوک سبھا کے رکن تھے، جو 18 مئی 2014 کو ختم ہوئی تھی۔ حاجی نورالاسلام نے اس بار 7 مئی کو کاغذات نامزدگی جمع کرائے تھے۔ انتخابی حلف نامے کے مطابق، ایک امیدوار کو گزشتہ 10 سالوں میں کسی بھی وجہ سے کسی بھی بقایا سرکاری سروس بل کا تصفیہ کرنا پڑتا ہے۔