دیونار منڈی میں قربانی کے جانوروں کی آمد شروع - eid al adha 2024

عید الضحٰی کے لیے ممبئی کی دیونار منڈی میں مویشیوں اور بکروں کے ساتھ تاجروں کی آمد شروع ہوگئی ہے۔ اب تک 40000 سے زائد بکرے اس منڈی میں آچکے ہیں۔ تاجروں کو اس بار کاروبار میں بہتری آنے کی امید ہے۔

ممبئی:ممبئی میں واقع دیونار بکرا منڈی میں ملک کی مختلف ریاستوں سے تاجر اپنے اپنے جانوروں کے ساتھ آنا شروع کر دیا ہے۔ بارش سے قبل منعقد کی جانے والی ممبئی کی یہ واحد بڑی منڈی ہے جو وسیع و عریض علاقے میں پھیلی ہوئی ہے یہاں گزشتہ چھ ماہ سے عید الضحٰی کی تیاری جاری ہے۔

جہاں جانوروں کے لیے بڑے بڑے شیڈ بنائے جاتے ہیں۔ جس میں ریاست مہاراشٹر اور اطراف کی ریاستوں کے بیوپاری بڑے پیمانے پر اپنے جانوروں کے ساتھ یہاں فروخت کرنے کی غرض سے آتے ہیں۔

ڈاکٹر کلیم پاشا پٹھان اس منڈی اور مذبح خانے کے انچارج ہیں، ان کا کہنا ہے کہ ہماری اس منڈی میں اطراف کی ریاستوں کے ساتھ ساتھ جموں کشمیر سے بھی بڑے پیمانے پر بکرے لائے جاتے ہیں منڈی اور انتظامیہ کے لیے بڑا چیلنج رہتا ہے۔ ہم مسلسل اس چیلنج کو قبول کرتے ہوئے کام کرتے ہیں۔

انہوں نے کہاکہ محض 3 ہفتوں تک ہمیں شب و روز ڈیوٹی انجام دینی ہوتی ہے۔ ممبئی میں اس بار گرمی کے لحاظ سے طبی مراکز قائم کیے گئے ہیں۔ حالانکہ گرمی کی وجہ سے جانوروں کو کوئی دقت ہوئی ہو اب تک ایسا کوئی کیس سامنے نہیں آیا۔ بارش اور گرمی کے لحاظ سے ہی یہاں شیڈ کو کافی اونچا بنایا گیا ہے تاکہ ہوا کہ نظم بہتر رہے۔

پٹھان نے بڑے جانور کی قربانی کے دوران ہونے والی بدنظمی کو لیکر کہا کہ ہم ہر ممکن کوشش کرتے ہیں کہ حالات بہتر رہیں۔ اسی لیے اس بار آن لائن سسٹم کے ذریعے ہی عوام کو مدعو کیا گیا ہے۔ تاکہ غیر ضروری ہجوم سے بچا جاسکے کیونکہ پہلے اور اب میں بہت فرق ہے جانوروں کی تعداد دوگنی ہو چکی ہے۔