نوئیڈا: مبینہ پولیس انکاؤنٹر میں ملزم زخمی

ضلع نوئیڈا کے کوتالی فیز ون میں پولیس نے انکاؤنٹر کے بعد لوٹ اور چوری کے متعد معاملے میں ملوث ایک مجرم کو گرفتار کرلیا۔پولیس انکاونٹر میں مجرم کے پاؤں میں گولی لگی۔ پولیس نے کہا کہ پورے معاملے کی تفتیش کی جا رہی ہے۔

نوئیڈا: ریاست اتر پردیش کے ضلع نوئیڈا زون کے اے ڈی سی پی منیش کمار مشرا نے بتایا کہ رات پولیس ٹیم سیکٹر 14 اے فلائی اوور کے نیچے دہلی سے آنے والے راستے کی چیکنگ کر رہی تھی۔ تبھی ایک شخص موٹر سائیکل پر آتے دیکھا۔ پولیس ٹیم نے اسے رکنے کا اشارہ کیا لیکن وہ نہیں رکا۔

پولیس کو دیکھ کر وہ سیکٹر 14 اے کے پیچھے نالے کی طرف بھاگنے لگا۔ پولیس ٹیم نے اس کا تعاقب کیا تو اس کی موٹر سائیکل پھسل کر گر گئی۔ خود کو پولیس میں گھرا دیکھ کر اس نے پولیس ٹیم پر فائرنگ کردی۔ پولیس کی جانب سے اپنے دفاع میں کی گئی کارروائی میں بدمعاش کی ٹانگ میں گولی لگی۔ جس میں وہ زخمی ہو گیا۔

بدمعاش کی شناخت دہلی کے جگت پوری تھانہ علاقے کی اکھاڑا گلی برہم پوری کے نوید کے طور پر کی گئی ہے۔ پولیس کے مطابق نوید ایک شاطر چور اور لٹیرا ہے۔ بقول پولیس اس کے خلاف دہلی کے کشمیری گیٹ تھانے، کوتوالی دہلی، منڈاولی، لاہوری گیٹ، نیو عثمان پوری وغیرہ میں لوٹ اور چوری کے تقریباً 18 مقدمات درج ہیں۔ پولیس نے کہاکہ پورے معاملے کی تفتیش کی جا رہی ہے۔ اس معاملے میں مزید لوگوں کی گرفتاری عمل میں آسکتی ہے۔