روہت گل اور پھر کوہلی کو سستے میں آوٹ کرنے والا یہ بنگلہ دیشی کھلاڑی کون ہیں - Who is Hasan Mahmud

بنگلہ دیش کے خلاف پہلے ٹیسٹ کے پہلے دن بھارت کا ٹاپ آرڈر ناکام رہا۔ ویراٹ کوہلی اور روہت شرما جیسے اسٹار بلے باز 24 سالہ بنگلہ دیشی تیزی گیندباز حسن محمود کے سامنے گھٹنے ٹیک دیے۔ لیکن دن کے اختتام پر جیسوال، جڈیجہ اور اشون نے ٹیم کو مضبوط پوزیشن میں کھڑا کر دیا ہے۔

نئی دہلی: بنگلہ دیش کے خلاف چنئی کے چیپاک اسٹیڈیم میں کھیلے جا رہے پہلے ٹیسٹ میچ میں ٹیم انڈیا کے مایہ ناز بلے باز بنگلہ دیش کے 24 سالہ نوجوان تیز گیند باز حسن محمود کے سامنے لاچار و بے بس نظر آئے ۔ کیونکہ حسن محمود نے اپنی مہلک باؤلنگ کی بدولت بھارت کے ٹاپ آرڈر کو تہس نہس کر دیا تھا۔

ٹیم انڈیا کے اسٹار بلے باز تیز گیند باز حسن محمود کا سامنا کرنے میں پوری طرح ناکام رہے۔ ٹاپ 3 بھارتی بلے باز، کپتان روہت شرما (6)، شبمن گل (0) اور ویراٹ کوہلی (6) سستے میں آؤٹ ہو کر پویلین لوٹ گئے۔ بنگلہ دیش کے مین گیندباز تسکین احمد جہاں ایک بھی وکٹ نہیں لے سکے وہیں حسن محمود نے چار وکٹ لے کر سب کو حیران کردیا۔

اس کے بعد رشبھ پنٹ اور یشسوی جیسوال کے درمیان 62 رنز کی شراکت ہوئی اور لنچ تک ہندوستان کا اسکور (88/3) رہا۔ لیکن، کھانے کے وقفے کے بعد، محمود کا جادو ایک بار پھر کام کر گیا اور انہوں نے 39 رن کے ذاتی اسکور پر رشبھ پنٹ کو وکٹ کے پیچھے آوٹ کرا دیا۔ابھی اس گیند باز نے 4 وکٹیں اپنے نام کر رکھی ہیں اور مسلسل شاندار باؤلنگ کر رہے ہیں۔

حسن محمود کون ہیں؟

حسن محمود 1999 میں بنگلہ دیش کے چٹاگانگ میں پیدا ہوئے۔ اس وقت ان کی عمر 24 سال ہے۔ 2020 میں انہوں نے زمبابوے کے خلاف ٹی 20 میچ میں ڈیبیو کیا۔ اس کے بعد سے وہ 18 ٹی ٹوئنٹی میچز کھیل چکے ہیں اور 18 وکٹیں لے چکے ہیں۔ انھوں نے ون ڈے میں بھی شاندار کارکردگی کا مظاہرہ کیا۔ وہ اب تک 22 ون ڈے میچوں میں 30 وکٹیں لے چکے ہیں۔

محمود نے ٹیسٹ کرکٹ میں اپنا ڈیبیو رواں سال سری لنکن ٹیم کے خلاف کیا۔ انہوں نے اپنے ڈیبیو میچ میں 6 وکٹیں لے کر سب کی توجہ اپنی جانب مبذول کرائی تھی۔ وہ اس وقت سرخیوں میں آئے جب انہوں نے پاکستان کے خلاف ٹیسٹ سیریز جیتی اور اس سیریز میں انہوں نے 8 وکٹیں حاصل کیں۔ اس سیریز میں حسن محمود نے ایک اننگ میں 5 وکٹ بھی لیے تھے۔