نئی دہلی: بھارت اور نیوزی لینڈ کے درمیان دوسرا ٹیسٹ میچ مہاراشٹر کرکٹ ایسوسی ایشن سٹیڈیم پونے میں کھیلا جا رہا ہے۔ اس میچ میں ہندوستانی ٹیم نیوزی لینڈ کے اسپن گیند بازوں کے سامنے تاش کے پتوں کی طرح بکھر گئی۔ روہت شرما، ویرات کوہلی، شبمن گل اور رشبھ پنت جیسے اسٹار بلے بازوں سے مزین ٹیم انڈیا اپنے ہی گھر میں اسپن کے سامنے 156 رنز پر ڈھیر ہوگئی۔
نیوزی لینڈ کی دوسری اننگز میں بیٹنگ جاری ہے۔ دوسرے دن اسٹمپ تک اس نے پانچ وکٹوں پر 198 رنز بنائے۔ٹام بلنڈل 30 اور گلین فلپس 9 رنز بنانے کے بعد کریز پر موجود ہیں۔ نیوزی لینڈ کی مجموعی برتری 301 رنز ہے اور اس کی پانچ وکٹیں باقی ہیں۔بھارتی ٹیم کی پہلی اننگز 156 رنز تک محدود رہی۔ میچ میں نیوزی لینڈ کی ٹیم نے پہلی اننگز میں 259 رنز بنائے تھے۔
اکیلے مچل سینٹنر نے 7 وکٹیں حاصل کیں۔ پہلی اننگز کی بنیاد پر کیویز کو 103 رنز کی برتری حاصل ہوگئی۔ اس میچ میں نیوزی لینڈ کے کپتان ٹام لیتھم نے ٹاس جیت کر پہلے بیٹنگ کا فیصلہ کیا۔ نیوزی لینڈ نے اپنی پہلی اننگز میں 259 رنز بنائے۔ بھارت کی جانب سے واشنگٹن سندر نے سات وکٹیں حاصل کیں۔ اگر دیکھا جائے تو نیوزی لینڈ کی ٹیم اس گراؤنڈ پر اپنا پہلا ٹیسٹ کھیلنے آئی ہے۔ رواں سیریز کا پہلا میچ 16 اکتوبر سے بنگلورو میں کھیلا گیا تھا جس میں روہت شرما کی کپتانی میں بھارتی ٹیم کو 8 وکٹوں سے شکست کا سامنا کرنا پڑا تھا۔ پہلا ٹیسٹ جیت کر کیوی ٹیم نے سیریز میں 1-0 کی برتری حاصل کر لی۔