سچن تنڈولکر کی کرکٹ میدان میں ہوگی واپسی، اس لیگ میں کھیلتے ہوئے نظر آئیں گے؟ - International Masters League

کرکٹ کی دنیا میں ایک اور نئے ٹورنامنٹ انٹرنیشنل ماسٹرز لیگ کا آغاز ہونے والا ہے۔ اس ٹورنامنٹ میں ماسٹر بلاسٹر سچن تنڈولکر سمیت کئی بڑے ستارے کھیلتے ہوئے نظر آنے والے ہیں۔

نئی دہلی: بھارتی کرکٹ ٹیم کے سابق بلے باز ماسٹر بلاسٹر سچن تنڈولکر کے مداحوں کے لیے ایک بڑی خوشخبری ہے۔ اب سچن کے مداح ایک بار پھر انہیں کرکٹ کے میدان پر کھیلتے ہوئے دیکھ سکیں گے۔

دراصل، سابق ہندوستانی کرکٹر اس سال شروع ہونے والی انٹرنیشنل ماسٹرز لیگ (آئی ایم ایل) میں کھیلتے ہوئے نظر آئیں گے۔ انٹرنیشنل ماسٹرز لیگ کا انعقاد ٹی ٹوئنٹی فارمیٹ میں کیا جائے گا۔ اس لیگ میں چھ ٹیمیں شرکت کریں گی۔ اس لیگ کا خاکہ بھارت کے دو عظیم کرکٹ کھلاڑی سنیل گواسکر اور سچن تنڈولکر نے دیا ہے۔

انہوں نے اس لیگ کو اسپورٹس مینجمنٹ کمپنی PMG Sports اور SPORTFIVE کے اشتراک سے منعقد کرانے کا فیصلہ کیا ہے۔ سچن کے علاوہ کئی اور لیجنڈ کرکٹرز بھی اس لیگ میں کھیلتے ہوئے نظر آئیں گے۔

یہ لیگ چھ کرکٹ کھیلنے والے ممالک کے درمیان کھیلی جائے گی۔ جس میں بھارت، آسٹریلیا، جنوبی افریقہ، ویسٹ انڈیز، انگلینڈ اور سری لنکا کی ٹیمیں شامل ہوں گی۔ اس لیگ میں ان تمام ممالک کے تجربہ کار کرکٹرز نظر آئیں گے، جنہیں دیکھنے کے لیے شائقین بے حد بے تاب ہیں۔ سنیل گواسکر کو اس لیگ کا کمشنر مقرر کیا گیا ہے۔

واضح رہے کہ اس لیگ کے میچ ممبئی، لکھنؤ اور رائے پور میں منعقد کیے جائیں گے۔ اس لیگ کے شیڈول اور ٹیم کا اعلان جلد کیا جائے گا۔