کانپور: بھارتی کرکٹ ٹیم بنگلہ دیش کے خلاف دو طرفہ سیریز کے دوسرے ٹیسٹ کے لیے کانپور پہنچ گئی۔ بی سی سی آئی نے اپنے ایکس اکاوئنٹ پر ٹیم کے چنئی سے کانپور کے سفر کی ایک ویڈیو بھی پوسٹ کی ہے۔ کانپور میں ٹیم انڈیا کا شاندار استقبال کیا گیا۔ ہوٹل میں بھی بھارتی ٹیم کا استقبال کیا گیا۔ اس دوران ویراٹ کوہلی کی ایک ویڈیو سوشل میڈیا پر وائرل ہو رہی ہے۔
دراصل ویراٹ کوہلی جیسے ہی ہوٹل پہنچے تو وہاں کھلاڑیوں کے استقبال کے لیے پہلے سے جمع ہوٹل کے عملے میں سے ایک نے جب کوہلی کو پھولوں کا گلدستہ پیش کیا اور کوہلی نے اسے شکریہ کے ساتھ قبول کیا تو ایک اور شخص کوہلی سے مصافحہ کرنا چاہا۔ جس پر کوہلی نے کہا کہ سر دو ہی ہاتھ ہے۔
ویڈیو میں دیکھا جاسکتا ہے کہ اس وقت کوہلی کے ایک ہاتھ میں بیگ اور دوسرے میں گلدستہ ہوتا ہے جس کی وجہ سے وہ مصافحہ کیے بغیر وہاں سے چلے گئے۔ اس کے بعد ہوٹل کا عملہ کوہلی کی بات سمجھ کر ہنسنے لگا۔ اب یہ ویڈیو سوشل میڈیا پر کافی وائرل ہو رہا ہے۔
واضح رہے کہ بھارت اور بنگلہ دیش کے درمیان دوسرا ٹیسٹ میچ 27 ستمبر سے کانپور میں کھیلا جائے گا۔ اس میچ میں کانپور اسٹیڈیم کے حکام نے دو ہزار اسکولی بچوں کو مفت میں میچ دکھانے کے ساتھ ساتھ مفت میں کھانا اور پانی بھی فراہم کرنے کا بھی انتظام کیا ہے۔ اسٹیڈیم میں 20 ہزار تماشائیوں کے بیٹھنے کی گنجائش ہے۔