احمد آباد: انڈین پریمیئر لیگ کے 45ویں میچ میں اتوار کو رائل چیلنجرز بنگلور نے گجرات ٹائٹنز کے خلاف ٹاس جیت کر پہلے گیند بازی کرنے کا فیصلہ کیا۔
آج نریندر مودی اسٹیڈیم میں رائل چیلنجرز بنگلور کے کپتان فاف ڈو پلیسس نے ٹاس جیت کر پہلے گیند بازی کا فیصلہ کیا۔ ڈو پلیسس نے کہا کہ ہدف کے تعاقب کے دوران وکٹ اچھا برتاؤ کرے گی، اس لیے وہ پہلے بالنگ کریں گے۔ انہوں نے کہا کہ آج نیا دن ہے اس لیے وہ اس میچ کو بھی مختلف انداز سے دیکھ رہے ہیں۔ انہوں نے کہا کہ گلین میکسویل کی واپسی ہوئی ہے اور وہ اسپن اچھا کھیلتے ہیں۔
گجرات ٹائٹنز کے کپتان شبھمن گل نے کہا کہ وہ بھی پہلے بالنگ کرنا پسند کریں گے۔ انہوں نے کہا کہ چند میچوں کو چھوڑ کر بلے بازوں نے اچھی بیٹنگ کی ہے اور گزشتہ چند میچوں میں ان کی ٹیم نے بھی اچھی بالنگ کی ہے۔ انہوں نے کہا کہ ٹیم میں کوئی تبدیلی نہیں کی گئی۔