بھارت بنگلہ دیش ٹیسٹ کا تیسرا دن بھی بارش کی نذر، کرکٹ شائقین مایوس - IND VS BAN 2nd Test

بھارت بمقابلہ بنگلہ دیش کے درمیان دوسرا ٹیسٹ میچ کانپور کے گرین پارک اسٹیڈیم میں 27 ستمبر سے کھیلا جا رہا ہے لیکن میچ کا تیسرا دن بھی بارش کی نذر ہوگیا ہے۔ پہلے دن صرف 35 اوورز کا ہی کھیل ہوسکا تھا۔

کانپور: بھارت اور بنگلہ دیش کے درمیان دوسرا ٹیسٹ میچ کانپور کے گرین پارک اسٹیڈیم میں کھیلا جا رہا ہے۔ اس ٹیسٹ میچ کے پہلے دن صرف 35 اوورز کا کھیل ہو سکا تھا۔ لیکن اس کے بعد دوسرا اور تیسرا دن بغیر کوئی گیند کرائے مننسوخ ہوگیا۔

میچ کے تیسرے دن صبح تقریباً دس بجے امپائروں نے گراؤنڈ کا معائنہ کیا۔ تاہم گراؤنڈ مکمل طور پر خشک نہ ہونے کی وجہ سے فیصلہ کیا گیا کہ دوسری بار بارہ بجے گراؤنڈ کا معائنہ کیا جائے گا۔ لیکن اس وقت بھی میدان کھیل کے لائق نہیں ہوسکا جس کے بعد 2 بجے دوبارہ گراؤنڈ کا معائنہ کیا گیا اور اس وقت گراؤنڈ کی حالت ایسی نہیں تھی کہ تیسرے دن بھی میچ شروع کیا جا سکے۔

کانپور ٹیسٹ کا دوسرا اور تیسرا دن بھی منسوخ ہونے کی وجہ سے کرکٹ شائقین مایوس نظر آر ہے ہیں۔ کیونکہ ان کے ٹکٹ کے پیسے برباد ہوگئے اور وہ ایک بھی گیند ان دو دنوں میں نہیں دیکھ سکے۔

واضح رہے کہ بھارت اور بنگلہ دیش کے درمیان دوسرے ٹیسٹ میچ کے پہلے دن صرف 35 اوورز کا کھیل ہو سکا تھا۔ ٹاس ہارنے کے بعد پہلے بیٹنگ کرتے ہوئے بنگلہ دیش کی ٹیم نے تین وکٹوں پر 107 رنز بنائے ہیں۔

اب موجودہ صورتحال کو دیکھتے ہوئے میچ کا نتیجہ نکلنا مشکل نظر آرہا ہے کیونکہ اب تک اس میچ میں بنگلہ دیش کی صرف تین وکٹیں گرے ہیں۔ اب اگر میچ چوتھے دن شروع ہوتا ہے تو میچ کا نتیجہ نکلنا بہت مشکل ہو جائے گا۔

کیونکہ بھارتی ٹیم کو جلد از جلد بنگلہ دیشی ٹیم کے کھلاڑیوں کو آؤٹ کرنا ہوگا۔ اس کے بعد دوبارہ بیٹنگ کرتے ہوئے بنگلہ دیشی ٹیم کو ایک بڑا ہدف دینا ہوگا اور پھر مہمان ٹیم کو جلد از جلد دوسری اننگز میں سمیٹنا ہوگا جو دو دن میں ممکن نہیں۔