سوپور: جموں و کشمیر کے سوپور میں انکاونٹر شروع ہوا۔ تفصیلات کے مطابق سگی پورہ میں عسکریت پسندوں اور سیکوریٹی فورسس کے درمیان ہوئے تصادم کے دوسرے روز سوپور میں تلاشی آپریشن کے دوران انکاونٹر شروع ہوا۔ سگی پورہ انکاونٹر میں دو پاکستانی عسکریت پسند ہلاک ہوئے تھے۔
اعلیٰ حکام نے بتایا کہ آج شام سوپور کے رام پورہ راجپورہ جنگلاتی علاقے میں عسکریت پسندوں کی موجودگی کی اطلاع کے بعد سرچ آپریشن شروع کیا گیا۔ آج شام سرچ آپریشن کے دوران جنگلاتی علاقہ میں چھپے عسکریت پسندوں نے سیکوریٹی فورسس پر فائرنگ کردی جس کے بعد جوابی کاروائی میں ایک عسکریت پسند ہلاک ہوگیا۔ مہلوک عسکریت پسند کی شناخت نہیں ہوئی ہے۔ تاہم مقتول عسکریت پسند کے قبضے سے اسلحہ اور گولہ بارود برآمد ہوا ہے۔