لوک سبھا انتخابات 2024: کشمیر میں سیکورٹی کے غیر معمولی انتظامات - Security Beefed up in Kashmir

Security Grid Tightened across Kashmir: جموں کشمیر کی پانچ میں سے دو پارلیمانی نشستوں - جموں اور ادھمپور سیٹ پر احسن اور پر امن طریقے پر پولنگ ہو چکی ہے، جب کہ سرینگر نشست کے لیے 13 مئی بارہمولہ نشست پر 20 جب کہ اننت ناگ - راجوری پارلیمانی حلقے پر 25 مئی کو ووٹنگ ہوگی۔

سرینگر (جموں کشمیر):سرینگر، بارہمولہ اور اننت ناگ - راجوری پارلیمانی نشستوں پر منعقد ہونے والے انتخابات کے احسن اور پر امن انعقاد لیے وادی کشمیر میں حفاظت کے سخت اور کڑے بندوبست کیے گئے ہیں۔ چوتھے مرحلے کے تحت سرینگر میں اگلے ہفتے 13 مئی کو ہونے والے انتخابات کے پیش نظر سرینگر میں سیکورٹی گریڈ کو مظبوط کیا گیا ہے جب کہ حساس مقامات پر سکیورٹی کی اضافی نفری کو تعینات کیا جا رہا ہے۔

سکیورٹی کے اعتبار سے ہر چیز پر باریکی سے نظر گزر رکھی جا رہی ہے۔ پولنگ مراکز خاص کر حساس پولنگ مراکز پر مضبوط سیکورٹی گریڈ، اسٹرانگ روم محفوظ بنانے اور الیکٹرانک ووٹنگ مشینوں یعنی ای وی ایمز کو پولنگ مراکز تک پہنچانے کے لیے جامع سیکورٹی اور بلیو پرنٹ تیار کیا جا رہا ہے۔ ادھر، حکام کی جانب سے سوشل میڈیا پلیٹ فارمز کے ممکنہ غلط استعمال پر بھی کڑی نگاہ رکھی جا رہی ہے۔ اس کے علاوہ پولنگ پارٹی کی نقل و حرکت، سینٹرل آرمڈ پولیس فورسز (سی اے پی ایف) کے لیے رہائش کے انتظامات اور عوامی اجتماعات، جلوسوں اور ریلیوں کے لیے حفاظتی پروٹوکول کی باریک بینی سے نگرانی کی جا رہی ہے۔

اس سے قبل جموں اور ادھپمور پارلیمانی حلقوں میں بھی ووٹنگ کا عمل خوش اسلوبی اور پر امن طریقے سے انجام دیا گیا اور ان حلقوں میں ووٹنگ کی شرح بھی اچھی خاصی ریکارڈ کی گئی۔ سرینگر پارلیمانی حلقے کے بعد بارہمولہ پارلیمانی سیٹ پر 20 مئی اور اننت ناگ - راجوری پارلیمانی نشست کے لیے انتخابات کی نئی تاریخ طے ہونے کے بعد اسی ماہ 25 مئی کو ووٹ ڈالے جا رہے ہیں۔ تاہم اس نشست کو کافی اہم مانا جا رہا ہے کیونکہ حد بندی کے بعد اس نشست میں راجوری اور پونچھ کے کئی اسمبلی حلقے بھی جوڑے گئے ہیں۔

واضح رہے کہ سرینگر، بارہمولہ اور اننت ناگ - راجوری پارلیمانی حلقوں میں پی ڈی پی، این سی، جموں کشمیر اپنی پارٹی، پیپلز کانفرنس جیسی جماعتیں آمنے سامنے ہیں۔ ان نشستوں پر جو امیدوار اس وقت انتخابی میدان میں ایک دوسرے کے مقابل لڑ رہے ہیں ان میں عمر عبداللہ، سجاد غنی لون، محبوبہ مفتی، وحید پرہ، آغا روح اللہ، ظفر اقبال منہاس، میاں الطاف اور اشرف میر کے نام قابل ذکر ہیں۔