عید سادگی کے ساتھ منائی جائے: مولانا شبیر احمد اویسی - Maulana Shabbir Ahmed ON EID

Eid al-Fitr 2024: عالم دین مولانا حافظ قاری شبیر احمد اویسی نے کہا کہ موجودہ صورت حال کے مدنظرعید نہایت ہی سادگی سے منائی جائے۔ دوسروں کا خیال رکھا جائے۔ عید خوشیوں کا تہوار ہے اور سادگی سے منانے سے اس کی خوشی دگنی ہوجاتی ہے۔

اونتی پورہ:ملک کی دوسری ریاستوں کی مرکز کے زیر انتظام یوٹی جموں و کشمیر میں بھی عیدالفطر کی تیاریاں زور شور سے جاری ہے۔اسی درمیان جنوبی کشمیر کے نامور عالم دین مولانا حافظ قاری شبیر احمد اویسی عام لوگوں سے عید الفطر کا مقدس تہوار سادگی سے منانے اور اس موقعے پر غربا اور مستحقین کا خاص رکھنے کی اپیل کی۔

عالم دین مولانا حافظ قاری شبیر احمد اویسی نے کہا کہ عید کی خوشی میں سماج کے کمزور طبقات کو شامل رکھنا ہی اصل عید ہے۔ موصوف اونتی پورہ میں ای ٹی وی بھارت کے نمائندے شبیر بٹ کے ساتھ خصوصی بات چیت کرتے ہوئے انہوں نے کہا کہ عید کے لغوی معنی خوشی کے ہیں اور ہمیں یہ خوشی شرعی حدود کے اندر ہی منانی چاہیے تاکہ خوشی منانے کے ساتھ ہم عبادت بھی کریں۔

مولانا شبیر احمد اویسی نے بتایا کہ عید کے روز دو رکعت شکرانہ کی نماز ادا کرنی ہوتی ہے۔ اسے قبل ہمیں صدقہ فطر ادا کرنا چاہیے تاکہ سماج کے کمزور لوگ بھی ہمارے ساتھ عید کی خوشیوں میں شامل ہوں۔ کیونکہ عید کے موقعے پر ان کو یاد رکھنا نبی اکرم صلہ علیہ وسلم کی تعلیمات کا حصہ ہے۔

انھوں نے مزید بتایا کہ عید دراصل اس روزدار کی عید ہے جس کے روزے قبول ہوئے ہیں اور جس کے روزے قبول نہ ہوں، اس کی حقیقی عید ہی نہیں ہے۔ اس لیے ہمیں عید عاجزی اور سادگی کے ساتھ ہی منانی چاہیے۔