ایم ایل اے پلوامہ کی بجلی فراہمی میں بہتری کی اپیل

ایم ایل اے پلوامہ وحید پرہ نے حکومت سے عوامی مشکلات کو مد نظر رکھتے ہوئے بجلی فراہمی میں بہتری کا مطالبہ کیا۔

پلوامہ:جنوبی کشمیر کے ضلع پلوامہ میں رکن اسمبلی اور پیپلز ڈیموکریکٹ پارٹی (پی ڈی پی) کے ساتھ یوتھ صدر وحید الرحمان پرہ نے ضلع کے مختلف عوامی وفود سے ملاقات کی۔ وفود میں اوقات کمیٹی پلوامہ کے نمائندے بھی شامل تھے، جنہوں نے اپنے اپنے علاقہ جات میں عوام کو درپیش مسائل کو ایم ایل اے کی نوٹس میں لایا جن میں بجلی، پانی، ڈمپنگ سائیٹ جسے مسائل کو حل کرنے کی اپیل کی گئی۔

ایم ایل اے پلوامہ وحید پرہ نے عوامی اہمیت کے حامل مسائل کو متعلقہ محکمہ جات کی نوٹس میں لانے اور انہیں حل کرنے کی یقین دہانی کی۔ پرہ نے میڈیا نمائندوں کے ساتھ بات کرتے ہوئے کہا کہ ’’سردیاں شروع ہونے سے قبل ہی بجلی کی آنکھ مچولی شروع ہوگئی ہے جس کی وجہ سے عوام کو کافی مشکلات کا سامنا کرنا پڑتا ہے۔‘‘

نیشنل کانفرنس (این سی) کے انتخابی منشور کا ذکر کرتے ہوئے پرہ نے کہا ’’سرکار نے بجلی کے حوالے سے جو منشور تیار کیا تھا، امید ہے کہ وہ اسے پورا کریں گے اور سرما کے دوران عوام کو راحت پہنچانے کا کام کریں گے۔‘‘ پرہ نے مزید کہا کہ ’’بجلی میٹر کے حوالہ سے پالیسی وضع کرنا، بجلی فیس معاف کرنا، بجلی ڈھانچے کو مزید مضبوط بنانا ایک یا دو دن کا کام نہیں تاہم کشمیر میں جو بجلی کا ڈھانچا موجود ہے اس کے مطابق عوام کو بجلی سپلائی کی جانی چاہئے۔‘‘ پرہ نے ڈمپنگ سائیٹ کے حوالے سے بات کرتے ہوئے ضلع انتظامیہ سے اپیل کی کہ وہ اس کو جلد سے جلد دوسری جگہ منتقل کریں تاکہ عوام کو راحت مل سکے۔