پلوامہ:جموں کشمیر کے ضلع پلوامہ کے لاسی پورہ علاقے میں خصوصی مہم کے دوران محکمہ جیولوجی اینڈ مائننگ پلوامہ کی ایک ٹیم پر غیر قانونی کانکنی کرنے والے افراد نے حملہ کر دیا۔ واقعے کے دوران ایک ملازم زخمی ہو گیا۔ زخمی ملازم کی شناخت محمد امین شیخ ولد عبدالمجید شیخ ساکن نودل ترال کے طور پر ہوئی۔ اسے علاج کے لیے ضلع اسپتال پلوامہ منتقل کیا گیا جہاں سے علاج و معالجہ کے بعد گھر روانہ کردیا گیا۔
ذرائع کے مطابق یہ جھگڑا ایک مہم کے دوران ہوا جس کا مقصد نالہ رامبی آرا لاسی پورہ میں غیر قانونی کانکنی کی سرگرمیوں کو روکنا تھا۔ حکام نے اس حملے کی مذمت کی ہے اور قصورواروں کے خلاف سخت کارروائی کی یقین دہانی کرائی ہے۔ پولیس تھانہ لاسی پورہ نے معاملے کی تفتیش شروع کردی ہے۔ضلع جیولوجی اینڈ مائننگ آفیسر پلوامہ ائینجر محمد منظور نے کہا کہ معاملہ پولیس کی نوٹس میں لایا گیا ہے اور کیس کی مزید تحقیقات جاری ہے۔