کولگام کے ویسو میں کشمیری پنڈتوں کی جا نب سے سالانہ مہا یگیہ کا انعقاد - maha yagya At Kulgam

ضلع کولگام کے ویسو علاقہ میں پنچ مُکھی شیو دھام کالونی میں کشمیری پنڈتوں کی جانب سے سالانہ مہا یگیہ کی تقریب منعقد کی گئی جس میں کثیر تعداد میں کشمیری پنڈتوں اور مقامی باشندوں نے حصہ لیا

اننت ناگ:مزکر کے زیر انتظام یوٹی جموں و کشمیر کے ضلع اننت ناگ کے کولگام میں منعقدہ دو روزہ تقریب 30 جولائی کی شام کو شروع ہوئی اور اگلے روز پران آہوتی کے ساتھ اختتام پذیر ہوئی۔ تقریب شیو دھام کالونی ویسو کولگام کے احاطہ میں موجود شیو مندر میں منعقد ہوئی جس میں عقیدت مندوں کی ایک بڑی تعداد نے شرکت کی۔ اس موقعے پر پنچ مکھی شیو دھام کے سلسلہ میں ورشک ہاون کا اہتمام کیا گیا اور اس کے ساتھ ساتھ وترن نوید کا بھی اہتمام کیا گیا۔

اس موقعے پر قریبی اور دوردراز علاقوں سمیت ملک کے مختلف مقامات سے کشمیری پنڈت برادری سے تعلق رکھنے والے عقیدت مند موجود رہے جنہوں نے اس سالانہ مہا یگیہ میں بڑھ چڑھ کر حصہ لیا۔

کشمیری پنڈت عقیدت مندوں کا کہنا ہے کہ اس مذہبی تقریب میں ملک اور جموں کشمیر میں امن و امان، سلامتی اور بھائی چارہ کے لئے خاص طور پر پرارتھنا کی گئی۔ انہوں نے اس سالانہ تقریب کو خطے کی ثقافتی اور روحانی روایات کا ثبوت قرار دیا۔ اس دوران عقیدت مندوں نے نہ صرف پر سکون ماحول میں اپنی عقیدت کا اظہار کیا بلکہ مذہبی رسوم و روایات پر عمل کرتے ہوئے اپنی روایات کو بھی اجاگر کیا۔