انجمن اوقاف جامع مسجد سرینگر نے اپنا سالانہ کلینڈر جاری کیا

انجمن اوقاف جامع مسجد نے میر واعظ فاؤنڈیشن کے اشتراک سے مرتب کردہ سال 1444-45 ھ اور 2024ء کے سالانہ کلینڈر کا جامع مسجد سرینگر میں منعقدہ ایک پُر وقار تقریب کے دوران اجرا کیا۔

سرینگر:انجمن اوقاف جامع مسجد سرینگر کا سال 1444-45 ھ اور 2024ء کا سالانہ کلینڈر اسلامی مذہبی فن تعمیر اور خاکوں کے چند بہترین نمونوں کے انتخاب سے تیار کیا گیا ہے۔ یہ کلینڈر انجمن اوقاف جامع مسجد نے میر واعظ فاؤنڈیشن کے اشتراک سے مرتب کیا ہے۔ یہ ایک تاریخی حقیقت ہے کہ کشمیر وقتاً فوقتاً بین ثقافتی تحریکوں کا مرکز رہا ہے اور کلینڈر ھٰذا میں اسی ثقافتی ورثے کی حامل فن تعمیر کی روایت کی بہترین عکاسی کی گئی ہے۔ اس کے ساتھ ساتھ یہ کلینڈر یہاں کی قدیم خانقاہوں، مساجد، مدارس، مقبروں اور عیدگاہوں کی تعمیر میں شامل ملی جلی ثقافت کے نمونوں کو بہترین انداز میں پیش کیا گیا ہے۔

کلینڈر میرواعظ فاؤندیشن کی جانب سے مذہب، ثقافت کے وسیع تر نشر و اشاعت اور تفہیم کے لیے کی جانے والی کوششوں کے تسلسل کا ایک حصہ ہے اور میر واعظ فاؤنڈیشن عوام الناس سے خطرے سے دوچار اس ثقافتی ورثے کو محفوظ بنانے کے لیے تعاون کا متمنی ہے۔

واضح رہے کہ اس پر وقار تقریب میں انجمن اوقاف جامع مسجد کے عہدیداروں کے علاوہ جن سرکردہ شخصیات نے شرکت کی ان میں مولانا شوکت حسین کینگ، ایڈوکیٹ نذیر احمد رونگا، الطاف احمد بٹ، مفتی غلام رسول سامون، جاوید احمد زرگر کے نام قابل ذکر ہیں۔