اپنی پارٹی کا اننت ناگ - راجوری سیٹ پر الیکشن موخر کرنے کی اپیل - Anantnag Rajouri Parliamentary Seat

Apni Party write Letter to ECIجموں کشمیر اپنی پارٹی نے مغل روڈ بار بار بند ہونے کی وجہ کارکنان، لیڈران کو ہو رہی پریشانیوں کے باعث الیکشن کمیشن سے تحریری طور درخواست کی ہے کہ اننت ناگ - راجوری سیٹ پر الیکشن موخر کرنے کی اپیل کی ہے۔

اننت ناگ (جموں کشمیر) :جموں و کشمیر اپنی پارٹی (جے کے اے پی) نے چیف الیکٹورل آفیسر کو ایک خط روانہ کیا ہے، جس میں اننت ناگ - راجوری پارلیمانی نشست کے لئے انتخابات مؤخر کرنے کی اپیل کی گئی ہے۔ یہ مطالبہ مغل روڈ، جو اننت ناگ-راجوری کو جوڑتا ہے، کے بار بار بند ہونے کے خدشات کے پیش نظر کیا گیا ہے، کیونکہ شاہراہ متاثر ہونے سے امیدواروں اور حامیوں کی نقل و حرکت میں رکاوٹیں حائل ہو رہی ہیں۔

ای ٹی وی بھارت کو حاصل شدہ جانکاری کے مطابق جموں و کشمیر اپنی پارٹی نے چیف الیکٹورل آفیسر کے دفتر کو ایک خط روانہ کیا ہے جس میں مطالبہ کیا گیا کہ اننت نا گ راجوری لوک سبھا نشست کے انتخابات بعد کے مراحل میں کرائے جائیں تاکہ امیدواروں اور حامیوں کو کسی قسم کی پریشانی کا سامنا نہ کرنا پڑے۔ کیونکہ مغل روڑ کے بار بار بند ہونے کی وجہ سے کارکنوں اور پارٹی رہنماؤں کو کشمیر اور جموں ڈویژن کے راجوری پونچھ میں آنے جانے میں دشواریوں کا سامنا کرنا پڑے گا۔ ایسی صورت حال میں انتخابی سرگرمیاں کافی متاثر ہوں گی اور ان مسائل کی وجہ سے انتخابی مہم میں امیدواروں کا جوش بھی کم نہیں ہوگا۔

اپنی پارٹی کے ضلع صدر اننت ناگ عبد الرحیم راتھر نے ای ٹی وی بھارت کو بتایا کہ پارٹی نے مغل روڑ کی بندش اور اس کے نتیجے میں ہونے والے نقصانات کا معاملہ الیکشن کمیشن آف انڈیا کے ساتھ اٹھایا ہے اور اس پر زور دیا ہے کہ وہ اس حلقے میں انتخابات موخر کر دیں۔ انہوں نے کہا کہ مغل شاہراہ کی بندش نے سیاسی سرگرمیاں کافی متاثر کی ہیں، اسلئے ان کا مطالبہ ہے کہ مذکورہ حلقہ میں انتخابات ملتوی کئے جائیں تاکہ وہ موسم بہتر ہونے کے بعد مؤثر طریقے سے مہم چلا سکیں گے۔