سرینگر: جموں وکشمیر پردیش کانگریس کمیٹی کے صدر طارق حمید قرہ نے بدھ کو ڈاکٹر فاروق عبدللہ کی رہائش گاہ واقع گپکار سرینگر جاکر اسمبلی انتخابات میں نیشنل کانفرنس کی شاندار جیت پر مبارک باد پیش کی۔ اس موقع پر انہوں نے میڈیا نمائندوں کے ساتھ بات چیت کے دوران کہا کہ وہ این سی کی انتخابات میں بہترین کارکردگی پر ڈاکٹر فاروق عبدللہ اور عمر عبدللہ کو صرف اور صرف مبارک باد پیش کرنے کی غرض سے ان کی رہائش گاہ پر گئے تھے تاہم اس دوران این سی کانگریس حکومت سازی سے متعلق کوئی بھی بات چیت نہیں ہوئی ہے۔
انہوں نے کہا کہ عمر عبدللہ پہلے ہی کہہ چکے ہیں این سے پہلے ایک قانون ساز پارٹی کا اجلاس طلب کرے گی اس کے بعد اتحاد کے اجلاس میں حکومت کے ماڈل پر بات چیت کی جائےگی۔ جب ان سے پوچھا گیا کہ کانگریس نائب وزیر اعلی کا عہدہ مانگ رہی ہے تو قرہ نے کہا کہ آج اس بارے میں کوئی بھی بات چیت نہیں ہوئی۔یہ بات آنے والے دنوں میں زیر بحث آئیں گی۔ البتہ آج میں مٹھائی کھانے اور مبارک باد کی غرض سے آیا تھا۔ دفعہ 370 کے موقف پر پوچھے گئے سوال پر انہوں نے کہا کہ یہ حساس معاملہ ہے جس پر مستقبل میں بات چیت کی جائے گی۔