ایئر فورس کے ونگ کمانڈر پر عصمت دری کا الزام، پولیس نے کیا مقدمہ درج - IAF Wing Commander Rape Allegation

سرینگر میں تعینات بھارتی ایئر فورس کے ونگ کمانڈر کے خلاف ایک خاتون فلائنگ آفیسر نے عصمت دری اور ذہنی ہراسانی کا الزام عائد کیا ہے۔ شکایت موصول ہونے پر جموں کشمیر پولیس نے ایف آئی آر درج کی ہے۔ یہ کیس 31دسبمر 2023اور یکم جنوری 2014کی درمیانی شب کا ہے۔

بڈگام (جموں و کشمیر) :جموں کشمیر پولیس نے بھارتی ایئر فورس کے ایک ونگ کمانڈر کے خلاف ریپ، ذہنی ہراسانی اور تعاقب کے الزامات پر ایف آئی آر درج کر لی ہے۔ یہ ایف آئی آر سرینگر کے ائیر فورس اسٹیشن پر تعینات ونگ کمانڈر کے خلاف درج کی گئی ہے۔ خاتون فلائنگ آفیسر نے الزام عائد کیا ہے کہ 31 دسمبر 2023 کو آفیسرز میس میں ہونے والی نیو ایئر پارٹی کے دوران ونگ کمانڈر نے ان کے ساتھ زبردستی کی۔

بڈگام پولیس اسٹیشن میں درج اس کیس میں ونگ کمانڈر پر قانون کی دفعہ 376(2) کے تحت مقدمہ درج کیا گیا ہے۔ یہ دفعہ بااختیار افراد کے ذریعے کی گئی جنسی ہراستی کے واقعات کو ظاہر کرتا ہے۔ خاتون فلائنگ آفیسر نے بتایا کہ یکم جنوری 2024 کی رات 2 بجے ونگ کمانڈر نے انہیں تحفہ دینے کے بہانے اپنے کمرے میں بلایا اور وہاں ان کے ساتھ زبردستی کی۔ خاتون نے بتایا کہ انہوں نے مسلسل ونگ کمانڈر کو روکنے کی کوشش کی تاہم وہ باز نہ آیا۔ خاتون کی جانب سے درج کی گئی شکایت میں کہا گیا : ’’میں نے بار بار اس (ونگ کمانڈر) سے یہ سب نہ کرنے کی اپیل کی اور ہر ممکن کوشش کی۔ بالآخر میں نے اسے دھکہ دیکر وہاں سے فرار ہونے میں کامیاب ہوئی۔‘‘

متاثرہ نے مزید بتایا کہ واقعے کے بعد وہ شدید صدمے کا شکار ہو گئیں اور انہیں سمجھ نہیں آرہا تھا کہ وہ آگے کیا کرے، اسے یہ خوف ستائے جا رہا تھا کہ اگر اس نے کسی سے شکایت کی تو ونگ کمانڈر ان سے کہیں بدلہ نہ لے۔

اس کے بعد خاتون نے دو دیگر خواتین آفیسرز سے مشورہ کیا، جنہوں نے انہیں شکایت درج کرنے کی ترغیب دی۔ تاہم، شکایت درج کرنے میں انہیں مشکلات کا سامنا کرنا پڑا اور انہوں نے الزام عائد کیا کہ انٹرنل کمیٹی نے بہتر انداز میں تحقیقات نہیں کی۔ شکایت کے مطابق، کمیٹی کی تحقیقات مئی میں ناکافی شواہد کی بنیاد پر غیر نتیجہ خیز قرار دی گئیں۔ خاتون نے کہا کہ ’’یہ کہنا غیر منطقی ہے کہ کوئی شخص گواہوں کے سامنے جنسی زیادتی کرے گا۔‘‘

خاتون نے مزید الزام عائد کیا کہ انہیں مسلسل ذہنی ہراسانی کا سامنا ہے اور ان کی نجی زندگی اور بات چیت پر نظر رکھی جا رہی ہے، جس کی وجہ سے ان کی ذہنی صحت پر منفی اثرات مرتب ہوئے ہیں۔ انہوں نے کہا کہ وہ خودکشی کے خیالات کا بھی شکار ہو چکی ہیں اور ان کی سماجی زندگی بالکل تباہ ہو گئی ہے۔ ادھر، بڈگام پولیس اسٹیشن کے ایک انسپکٹر کو اس کیس کی تحقیقات کا ذمہ سونپا گیا ہے۔ خاتون فلائنگ آفیسر نے پولیس سے اپیل کی ہے کہ وہ فوری کارروائی کریں اور اس کیس میں انصاف کو یقینی بنائیں۔