ایرانی صدر کی حادثاتی موت، بڈگام میں تعزیتی جلوس برآمد - Budgam Mourns Raisi Death

Budgam Residents Mourn Iran President Death: ایرانی صدر ابراہیم رئیسی سمیت ہیلی کاپٹر حادثہ میں ہلاک ہوئے افراد کے اہل خانہ اور جملہ ایرانیوں کے ساتھ یکجہتی کا اظہار کرتے ہوئے وسطی کشمیر کے بڈگام ضلع میں شیعہ آبادی نے تعزیتی جلوس برآمد کیا۔

بڈگام (جموں کشمیر):وسطی کشمیر کے بڈگام ضلع میں شیعہ آبادی نے ایرانی صدر ابراہیم رئیسیکی ہیلی کاپٹر حادثہ میں موت پر گہرے دکھ کا اظہار کرتے ہوئے تعزیتی جلوس برآمد کیا۔ تعزیتی جلوس میں شامل لوگوں نے ایرانی صدر اور ایرانی حکومت کے حق میں نعرے بازی کرتے ہوئے اپنے جذبات کا اظہار کیا۔ جلوس میں شامل لوگوں نے ہاتھوں میں پوسٹرز، پلے کارڈز اٹھا رکھے تھے جن پر ایرانی صدر کی تصاویر اور تعزیتی پیغامات درج تھے۔

تعزیتی جلوس میں شامل لوگوں نے میڈیا نمائندوں کے ساتھ بات کرتے ہوئے کہا: ’’ہم نے کسی شخص یا حکومت کے خلاف جلوس برآمد نہیں کیا بلکہ ایرانی باشندوں کے ساتھ یکجہتی کا اظہار کرتے ہوئے جلوس کی شکل میں اپنے جذبات کا برملا اظہار کیا۔‘‘ ایرانی صدر کی حادثاتی موت کے بعد بڈگام میں کے مختلف مقامات پر لوگوں نے کالے پرچم نصب کرکے اپنے غم کا اظہار کیا۔

جلوس میں شامل ایک مقامی نوجوان نے کہا: ’’ایرانی صدر کی حادثاتی موت سے بڈگام کے باشندے سوگوار ہیں اور اس غم کا اظہار کرنے کے لیے ہم نے جلوس برآمد کیا ہے۔‘‘ تعزیتی جلوس میں سینکڑوں افراد نے شرکت کی اور ’’حسینیت زندہ باد‘‘ کے نعرے بھی بلند کیے۔ یاد رہے کہ گزشتہ روز ابراہیم رئیسی، ایران کے وزیر خارجہ سمیت کئی اہم افراد ہیلی کاپٹر میں سوار تھے اور ہیلی کاپٹر حادثہ کا شکار ہو گیا۔ اس حادثہ کے قریب ایک روز بعد ہیلی کاپٹر میں سوار سبھی افراد کو مردہ قرار دے دیا گیا۔ دریں اثناء، بڈگام سیول سوسائٹی نے بھی اس حادثہ پر گہرے دکھ کا اظہار کرتے ایرانیوں کے ساتھ یکجہتی ظاہر کی ہے۔