راجوری میں پراسرار اموات معاملہ کی تحقیقات جاری، وزیر صحت سکینہ ایتو کا بیان

جموں وکشمیر کے راجوری ضلع میں پراسرار اموات کو لیکر عوام میں خدشات پائے جاتے ہیں جسے وزیر صحت نے دور کرنے کی کوشش کی۔

جموں : راجوری ضلع کے بدھل گاؤں میں ہونے والی پراسرار اموات سے متعلق بڑھتے ہوئے عوامی خدشات کو دور کرنے کی کوشش کرتے ہوئے وزیر صحت سکینہ ایتو نے آج کہا کہ اموات کی وجوہات کا پتہ چلانے کےلئے تحقیقات کی جارہی ہیں۔ انہوں نے اس معاملہ میں روشنی ڈالتے ہوئے کہا کہ محکمہ صحت کی پوری ٹیم نے متاثرہ گاؤں کا دورہ کیا اور تین ہزار سے زائد لوگوں کو گھر گھر جا کر چیک کیا۔ انہوں نے مزید کہا کہ ٹیموں نے ہر قسم کے نمونے جیسے پانی، کھانے اور دیگر اشیا کے نمونے اکٹھے کیے اور انہیں ٹیسٹ کے لیے بھیج دیا۔

وزیر صحت نے مزید کہا کہ اب تک جو رپورٹس آئی ہیں وہ تمام منفی آئے ہیں۔ سکینہ ایتو نے کہاکہ "تمام نمونوں کے ٹیسٹ کیے گئے ہیں جیسے پانی، کھانے کی اشیا، یہاں تک کے بسکٹ وغیرہ کے نمونوں کی بھی جانچ کی گئی، تاہم تمام رپورٹس منفی آئی ہیں۔ یہاں تک کہ انفلوئنزا کے تمام ٹیسٹ بھی منفی پائے گئے ہیں۔ وزیر نے کہا کہ محکمہ صحت نے قومی اداروں جیسے آئی سی ایم آر، نیشنل انسٹی ٹیوٹ آف وائرولوجی، نیشنل سینٹر فار ڈیزیز کنٹرول، پی جی آئی ایم ای آر، ڈی آر ڈی او، سی ایس آئی آر چنڈی گڑھ اور دیگر کے ذریعے بھی کچھ نمونوں کی جانچ کی گئی اور تمام رپورٹیں منفی پائی گئیں۔

وزیر نے مزید کہا کہ جن خاندانوں کے افراد کی اموات ہوئی ہیں ان کا ایک دوسرے سے فاصلہ دیڑھ کیلومیٹر ہے۔ انہوں نے کہا کہ گذشتہ 40 دنوں کے دوران علاقہ میں محکمہ صحت کی جانب سے تمام سہولیات جیسے ایمبولینس، ادویات اور دیگر ضروری ادویات کے علاوہ کسی بھی ہنگامی صورتحال سے نمٹنے کے لیے دستیاب رکھی گئی ہیں۔ انہوں نے کہا کہ معاملہ ابھی زیر تفتیش ہے اور محکمہ پولیس و ضلعی انتظامیہ اس معاملہ میں مزید تحقیقات کریں گے اور پتہ لگائیں گے کہ اصل معاملہ کیا ہے۔

سکینہ ایتو نے مرنے والوں کے اہل خانہ کے ساتھ گہری تعزیت کا اظہار کیا اور عوام کو یقین دلایا کہ حکومت اس معاملے کو انتہائی سنجیدگی سے دیکھ رہی ہے۔ انہوں نے کہا کہ ہمارے شہریوں کی فلاح و بہبود ہماری اولین ترجیح ہے اور ہم ان المناک اموات کی اصل وجہ کا پتہ چلانے کےلئے کوئی کسر نہیں چھوڑیں گے۔ انہوں نے عوام سے اپیل کی کہ وہ پرسکون رہیں اور موت کی اصل وجہ کا پتہ لگانے کے لیے کی جا رہی تحقیقات کے دوران ضلعی انتظامیہ کا مکمل تعاون کریں۔