چرنجیت کور جموں و کشمیر کی سبھی زبانوں میں گانے کی صلاحیت رکھتی ہیں - KASHMIRI SINGER CHARANJIT KAUR

ابھرتی ہوئی گلوکارہ چرنجیت کور نہ صرف ہندی، پنجابی اور کشمیری زبان میں گاتی ہیں بلکہ وہ ڈوگری، پہاڑی، گوجری، بلتی اور لداخی وغیرہ میں بھی اپنی مدھر آواز میں گانے کی صلاحیت رکھتی ہیں۔

سرینگر: وادیٔ کشمیر کے نوجوان جہاں اداکاری، فلم سازی اور گلوکاری میں اپنی بھر پور صلاحیت کا مظاہرے کر کے قابل تعریف کام انجام دے رہیں۔ وہیں یہاں ایسے بھی نوجوان گلوکار ہیں جوکہ کئی زبانوں میں گاتے ہیں۔ انہی میں سے ایک ہیں چرنجیت کور۔ یہ ابھرتی ہوئی گلوکارہ نہ صرف ہندی، پنجابی اور کشمیری زبان میں گاتی ہیں بلکہ یہ ڈوگری، پہاڑی، گوجری، بلتی اور لداخی وغیرہ میں بھی اپنی مدھر آواز میں گانے کی صلاحیت رکھتی ہیں۔

وسطی کشمیر ضلع بڈگام سے تعلق رکھنے والی 30 سالہ چرنجیت کور اسکول کے دنوں سے ہی گانے کا شوق رکھتی تھی۔ ایسے میں اگرچہ انہوں نے شروعات کیرتن گانے سے کی، تاہم بعد میں چرنجیت نے بالی ووڈ کے ساتھ پنچابی نغمے میں بھی گایا۔ اپنی گلوکاری میں پختگی لانے کے لیے ابتدائی طور پر انہیں اپنے والد کی رہبری اور رہنمائی حاصل رہی۔ اس طرح ان کے والد ہی ان کے پہلے استاد رہے ہیں۔

چرنجیت کور جموں وکشمیر کی تقریباً ہر زبان میں گاتی ہیں۔ مادری زبان پنجابی ہونے کے باوجود یہ کشمیری بھی بہتر طور گاتی ہیں۔ اس کے علاوہ یہ قومی سطح پر لداخی، ڈوگری، پہاڑی اور گوجری زبان میں کئی گیت گا چکی ہیں۔

اس گلورہ نے پوسٹ گریجویشن کی ہے۔ ان کی گائیکی اس وقت پہلی مرتبہ منظر عام پر آئی جب انہوں نے لتا منگیشکر کا گایا ہوا نغمہ "جی ہمیں منظور ہےآپ کا یہ فیصلہ" گایا۔ اس کے بعد چرنجیت ریاستی اور قومی سطح کے کئی کنسرٹ میں شرکت کر کے لوگوں سے داد و تحسین حاصل کر چکی ہے۔ وہیں انہیں آل انڈیا ریڈیو اور دوردرشن ٹیلی پر بھی اپنی مدھر آواز میں گانے کا موقع ملا ہے۔

چرنجیت کور کہتی ہیں وادیٔ کشمیر میں کئی اچھے گلوکارہ تو ہیں لیکن پلیٹ فارم اس نوعیت کے میسر نہیں ہیں جو ہونے چاہئے۔ اگر یہاں پلیٹ فارم میسر ہو پائے تو یہاں کے نوجوان کو بھی موثر طور اپنی صلاحیت اور قابلیت دکھانے کو بھر پور موقع حاصل ہو پائے گا۔ چرنجیت کور بالی ووڈ میں گانے کا خواب رکھتی ہیں اور نہ صرف اپنا بلکہ کشمیر کا نام روشن کرنا چاہتی ہیں۔