سرینگر: عبدالحق خان نے دو برس قبل پی ڈی پی کو خیرآباد کیا تھا۔ تاہم آج تقریبا دو برس بعد گھر واپسی کی ہے۔ ایسے میں انہیں پی ڈی پی صدر محبوبہ مفتی اور پارٹی کے دیگر سینیئر رہنماؤن نے خیر مقدم کیا۔
اس موقع پر صحافیوں سے بات کرتے ہوئے عبدالحق خان نے کہا کہ جموں و کشمیر کے حالات کی وجہ سے میں نے خود کو پی ڈی پی سے الگ کیا تھا۔ تاہم اب میں دوبارہ پارٹی میں شامل ہو کر اپنی ذمہ داریاں سنبھالنے کے لیے تیار ہوں۔ عبدالحق خان سابق ریاست جموں و کشمیر میں بی جے پی، پی ڈی پی مخلوط حکومت دیہی ترقی، پنچایتی راج اور قانون و انصاف کے وزیر رہ چکے ہیں۔
انہوں نے سال 2009 سے 2018 تک قانون ساز اسمبلی میں لولاب حلقے کی نمائندگی کی ہے جبکہ عبدالحق خان پیپلز ڈیموکریٹک پارٹی کی ٹکٹ پر 2008 اور 2014 میں لولاب حلقے سے ایم ایل اے بھی رہے ہیں۔