کشمیر سرحد پر جنگلاتی آگ سے بارودی سرنگوں کا دھماکہ

سرحدی ضلع پونچھ میں ایل او سی پر جنگلاتی آگ سے بارودی سرنگوں کے دھماکے سے لوگوں میں خوف و ہراس کا ماحول ہے۔

جموں:صوبہ جموں کے سرحدی ضلع پونچھ میں لائن آف کنٹرول (ایل او سی) کے نزدیک خطرناک جنگلاتی آگ کے باعث تقریباً نصف درجن بارودی سرنگیں پھٹ گئیں۔ یہ دھماکے بدھ کی رات کرشنا گھاٹی سیکٹر کے فارورڈ علاقوں میں ہوئے، جہاں یہ بارودی سرنگیں بھارت کے انسدادِ دراندازی رکاوٹ نظام کا ایک حصہ ہیں۔

حکام نے بتایا کہ چند گھنٹوں کے دوران ہی تقریباً چھ دھماکوں کی آوازیں اس وقت سنی گئیں، جب آگ سرحد پار سے بھارتی حدود میں تک پھیل گئی۔ اب تک کسی جانی نقصان کی کوئی اطلاع نہیں ہے، تاہم فائر ٹینڈرز آگ پر قابو پانے کے لیے مصروف عمل ہیں۔ افسران کے مطابق آگ کی اصل وجہ کا ابھی تک تعین نہیں ہو سکا، تاہم خدشہ یہ ظاہر کیا جا رہا ہے کہ ’’یہ ایک سوچا سمجھا اقدام ہو سکتا ہے، جس کا مقصد بھارت کے سرحدی حفاظتی نظام کو نقصان پہنچانا ہے۔‘‘

ایک افسر نے نام ظاہر نہ کرنے کی شرط پر بتایا: ’’ہم اس واقعے کی وجوہات کی مکمل تحقیقات کر رہے ہیں تاکہ اگر کوئی سازش ہو تو اسے بے نقاب کیا جا سکے۔‘‘ اس واقعے کے بعد بھارتی فوج نے اپنی نگرانی مزید سخت کر دی ہے اور کسی بھی دراندازی کی کوشش کو ناکام بنانے کے لیے چوکسی کو مزید بڑھا دیا گیا ہے۔