کشتواڑ انکاؤنٹر میں دو فوجی اہلکار ہلاک، دو زخمی - Kishtwar Encounter

جموں و کشمیر کے کشتواڑ ضلع میں سیکورٹی فورسز اور عسکریت پسندوں کے درمیان تصادم جاری ہے۔ اس تصادم میں فوج کے دو جوان ہلاک اور دو زخمی ہو گئے۔ جانکاری کے مطابق محصور علاقے میں چار عسکریت پسند پھنسے ہوئے ہیں۔ پوری خبر پڑھیں...

جموں: جموں و کشمیر کے کشتواڑ میں جمعہ کو فوج اور عسکریت پسندوں کے درمیان شدید تصادم ہوا۔ اس تصادم میں فوج کے دو جوان ہلاک جب کہ دو زخمی ہو گئے۔ زخمی فوجیوں کا قریبی اسپتال میں علاج کیا جا رہا ہے۔ ہلاک ہونے والے فوجیوں کی شناخت نائب صوبیدار وپن کمار اور کانسٹیبل اروند سنگھ کے طور پر ہوئی ہے۔

فوج کی وائٹ نائٹ کور نے سوشل میڈیا پلیٹ فارم ایکس پر ہلاک فوجیوں کی تصاویر کے ساتھ اس خبر کی تصدیق کی۔ کور نے پوسٹ میں لکھا کہ وائٹ نائٹ کور بہادروں کی عظیم قربانی کو سلام پیش کرتا ہے اور ان کے اہل خانہ کے ساتھ گہری تعزیت کا اظہار کرتے ہیں۔

فوج کی جانب سے بتایا گیا کہ عسکریت پسندوں کو پکڑنے کے لیے جنگی بنیادوں پر کارروائی کی جا رہی ہے۔ انسداد عسکریت پسندی کے اس آپریشن میں شامل سیکورٹی فورسز کو مضبوط بنانے کے لیے اضافی دستے علاقے میں بھیجے جا رہے ہیں۔

غور طلب ہے کہ یہ انکاؤنٹر اس وقت شروع ہوا جب فوج اور پولیس کی ایک مشترکہ سیکورٹی ٹیم نے خفیہ اطلاع پر کارروائی کرتے ہوئے، چترو بیلٹ کے علاقے نائدگھم میں محاصرے اور تلاشی کی کارروائی شروع کی۔ خود کو چاروں طرف سے گھیرے ہوئے پا کر عسکریت پسندوں نے فوجیوں پر گولی چلا دی۔ تاہم آج ہفتہ کے دن بھی انسداد عسکریت پسندی مخالف آپریشن جاری ہے۔