پنجاب میں کشمیری طالب علم کی لاش برآمد، طلباء تنظیم کی حکومت سے مداخلت کی اپیل

خاندان اس وقت شدید صدمے میں ہے اور انہوں نے لاش کی جلد واپسی کے لیے ایسوسی ایشن سے مدد کی درخواست کی ہے۔

گاندربل: جموں و کشمیر سٹوڈنٹس ایسوسی ایشن ( جے کے ایس اے) نے پیر کو پنجاب میں مردہ پائے گئے کشمیری طالب علم سالک نصیر ، ساکن صفاپورہ، گاندربل کی موت کا معاملہ پنجاب حکومت اور جموں و کشمیر کے وزیر اعلیٰ دفتر کے ساتھ اٹھایا ہے۔ سالک نصیر کی لاش پنجاب کے گوبند گڑھ کے قریب ان کے کمرے میں ملی۔ ایسوسی ایشن کے ترجمان نے ایک بیان میں کہا کہ ایسوسی ایشن کے نیشنل کنوینر ناصر نے پنجاب کے چیف سیکر ٹری کے اے پی سنہا سے بات کی ہے اور فوری مدد کی درخواست کی ہے تاکہ سالک نصیر کی لاش کو ان کے آبائی علاقے گاندربل، کشمیر واپس لایا جا سکے۔

خاندان اس وقت شدید صدمے میں ہے اور انہوں نے لاش کی جلد واپسی کے لیے ایسوسی ایشن سے مدد کی درخواست کی ہے۔ ایسوسی ایشن نے پنجاب حکومت سے درخواست کی ہے کہ وہ فوری مدد فراہم کرے تاکہ سالک کی لاش کو کشمیر میں واپس لایا جا سکے اور ان کے خاندان کو آخری رسومات کی ادائیگی کی اجازت دی جاسکے۔ انہوں نے سالک کی موت کی مکمل اور غیر جانبدارانہ تحقیقات کا بھی مطالبہ کیا ہے۔

ناصر نے اس معاملے پر پنجاب کے اپوزیشن لیڈر پرتاپ سنگھ باجوا سے بھی بات کی ، جنہوں نے یقین دلایا کہ کشمیری طالب علم کی لاش جلد کشمیر بھیجی جائے گی۔ چیف سیکرٹری نے یقین دلایا کہ ضلعی افسر اور ایس ایس پی کو ہدایات جاری کی گئی ہیں کہ وہ جلد از جلد ضروری اقدامات کریں اور متاثرہ خاندان کو مشکل وقت میں مدد فراہم کریں۔