جموں میں بھی جامہ تلاشی، کارڈ چیک کرنے کا سلسلہ شروع

Checking frisking in main city jammuوادی کشمیر کی طرح جموں خطے میں بھی یوم جمہوریہ کی تقریب سے قبل جامہ تلاشیوں اور شناختی کارڈ چیک کرنے کا سلسلہ شروع ہو چکا ہے۔

جموں:جموں میں بھی وادی کشمیر کی طرح یوم جمہوریہ کی تقریب سے قبل سیکورٹی بڑھا دی گئی ہے۔ جموں میں سخت حفاظتی انتظامات کو یقینی بنانے کے لیے، بھارت - پاکستان سرحد سمیت پورے جموں خطے میں سیکورٹی فورسز اور پولیس کو الرٹ پر رکھا گیا ہے۔ پولیس نے جموں شہر میں ہفتہ کے روز اسپیشل چیکنگ انجام دی، بس اسٹینڈ جموں، چیول چوک میں بھی چیکنگ کی گئی جبکہ پولیس اہلکاروں نے راہگیروں سے پوچھ گچھ بھی کی۔

پولیس ترجمان نے بتایا کہ ’’22 جنوری کو پران پرتشٹھا کی تقریب اور یوم جمہوریہ کی تقاریب سے قبل حفاظتی اقدامات کو بڑھا دیا گیا ہے۔ جوانوں کو چوکس رہنے کی ہدایت دی گئی ہے۔‘‘ حکام نے بتایا کہ سیکورٹی فورسز نے جموں شہر اور خطے کے دیگر حصوں میں گاڑیوں اور پیدل چلنے والوں کی چیکنگ تیز کر دی ہے۔ جبکہ جموں کے سینئر سپرنٹنڈنٹ آف پولیس ونود کمار نے آج چیک پوائنٹس اور چوکیوں سمیت زمینی سطح پر سیکورٹی انتظامات کا جائزہ لیا۔

حکام نے بتایا کہ جموں کشمیر پولیس اور سینٹرل ریزرو پولیس فورس (سی آر پی ایف) کے اہلکاروں کو اہم اور حساس علاقوں میں تعینات کیا گیا ہے۔ ایڈیشنل ڈائرکٹر جنرل آف پولیس آنند جین نے بھی تمام انٹیلی جنس ایجنسیز کو ہدایت دی ہے کہ وہ معلومات اکٹھی کریں تاکہ ملک دشمن اور سماج دشمن عناصر جموں خطہ میں اپنے مذموم عزائم میں کامیاب نہ ہو سکیں۔