برف پوش وادی گریز میں سنو گیمز کا انعقاد

Army organised snow games snow art in Gurez فوج نے شمالی کشمیر کے گریز علاقے میں طلبہ کے لیے سنو آرٹ، اور سنو گیمز مقابلوں کا انعقاد کیا۔

بانڈی پورہ:شمالی کشمیر کے بانڈی پورہ ضلع کی گریز وادی میں تازہ برف باری کے بعد فوج کے بگٹور یونٹ نے بگتور گاؤں میں بچوں کے لیے سنو آرٹ اور سنو گیمز مقابلوں کا انعقاد کیا۔ سنو آرٹ اور گیمز میں مقامی طلبہ کے علاوہ نوجوانوں نے بھی شرکت کی۔ اس موقع پر ننہے بچے برف پر کبڈی، کھو کھو سمیت دیگر کھیلوں مقابلوں میں شرکت کے دوران پر جوش دکھائی ہوئے۔ علاوہ ازیں نوجوانوں نے سنو آرٹ مقابلوں میں بھی شرکت کرکے اپنے فن پاروں کا مظاہرہ کیا۔

مقامی باشندوں نے فوج کے اس اقدام کی سرہنا کرتے ہوئے اسے نیک شگون اور خوش آئند اقدام قرار دیا۔ انہوں نے کہا کہ اس سے نہ صرف مقامی طلبہ کو تفریح کا سامان میسر ہوتا ہے بلکہ اس سے وادی گریز میں سنو/ونٹر گیمز کی اہمیت و افادیت کا پتہ چلتا ہے۔ انہوں نے ان مقابلوں سے گریز میں ونٹر ٹورزم کے ایک نئے باب کی شروعات کی امید ظاہر کیا۔

میڈیا نمائندوں کے ساتھ بات کرتے ہوئے مقامی باشندوں نے کہا کہ محکمہ سیاحت، ضلع انتظامیہ گریز کو سیاحتی نقشے پر لانے کی کوششیں جاری رکھے ہوئے جس میں فوج کی جانب سے تعاون کیا جا رہا ہے۔ انہوں نے کہا کہ گریز میں ونٹر ٹورزم کو فروغ دینے اور یہاں ونٹر اسپورٹس مقابلے منعقد کرنے سے نہ صرف یہاں کے ٹیلنٹ کو ایک پلیٹ فارم مہیا ہوگا بلکہ اس سے یہاں کی آبادی کو بھی روزگار کے وسائل مہیا ہوں گے جو جموں و کشمیر کی مجموعی اقتصادی تقویت کا باعث بن سکتا ہے۔ یاد رہے کہ گزشتہ برس بھی فوج، مقامی اسکول انتظامیہ نے اس طرح کے کھیل مقابلوں کا انعقاد کیا تھا اور اسنو کرکٹ ٹورنامنٹ کا بھی انعقاد عمل میں لایا گیا تھا۔