کشمیر میں بارہ مارچ سے مزید برف و باراں کا امکان

Kashmir Weather Update: محکمۂ موسمیات کے مطابق جموں و کشمیر میں 12 مارچ سے مزید بارش اور برف باری ہوسکتی ہے۔ بتایا جارہا ہے کہ یہاں ویسٹرن ڈسٹربنس سرگرم ہے جس کا اثر 14 مارچ تک رہ سکتا ہے۔

سرینگر:حالیہ برفباری کے بعد کشمیر میں بارہ مارچ سے موسم پھر سے خوشگوار ہو رہا ہے۔ وادی کے بیشتر علاقوں میں برف باری اور بارش ہوسکتی ہے۔ محکمۂ موسمیات کے مطابق وادی میں 12 مارچ سے ویسٹرن ڈسٹربنس سرگرم ہے۔ اس کا اثر 14 مارچ تک رہے گا۔ اس مدت کے دوران، شدید بارش اور برف باری سے وادی کا باقی ملک اور دنیا کے ساتھ زمینی رابطہ متاثر ہو سکتا ہے۔ یہاں جموں میں کل دن بھر بادل چھائے رہے۔ درجۂ حرارت بھی بڑھ گیا ہے۔ کشمیر میں منگل کو موسم خشک رہا۔ سری نگر اور اس کے ملحقہ علاقوں میں دھوپ چھائی رہی۔ تاہم سردی کی لہر جاری رہی کیونکہ درجۂ حرارت کئی علاقوں میں منفی رہا۔

محکمۂ موسمیات کے مطابق گلمرگ وادی کا سرد ترین علاقہ تھا جہاں کم سے کم درجۂ حرارت منفی 9.5 ڈگری سیلسیس ریکارڈ کیا گیا۔ سری نگر میں کم سے کم درجۂ حرارت منفی 2.0، قاضی گنڈ میں منفی 1.2، پہلگام میں منفی 4.0، کپواڑہ میں منفی 2.3 ڈگری سیلسیس رہا۔ اسی طرح رامبن ضلع کے کئی حصوں میں ہائی وے پر لینڈ سلائیڈنگ ہوئی ہے اور پہاڑوں سے ملبہ سڑک پر گرا ہے۔ جس کی وجہ سے آج قومی شاہراہ پر یکطرفہ ٹریفک کو چلنے کی اجازت دی گئی۔ جموں سے سرینگر کی طرف گاڑیوں کو آگے جانے کی اجازت ہوگی۔ دوپہر کے وقت ریاست کے بیشتر علاقوں میں آسمان صاف ہوگیا۔ محکمۂ موسمیات کے مطابق 6 مارچ کو بعض علاقوں میں بارش یا برفباری ہوسکتی ہے۔ اس کے بعد 10 مارچ تک موسم صاف رہے گا۔