روس نے طیارہ مار گرائے جانے کے بعد سلامتی کونسل کا ہنگامی اجلاس طلب کر لیا

Russia Called UNSC Meeting: روس اور یوکرین جنگ میں ایک مرتبہ پھر شدت آگئی ہے۔ یوکرین کے زریعہ مبینہ طور روسی طیارے کو مار گرائے جانے کے بعد اقوام متحدہ میں ماسکو نے سلامتی کونسل کا ہنگامی اجلاس طلب کر لیا ہے۔

اقوام متحدہ: روس کے وزیر خارجہ سرگئی لاوروف نے بدھ کو کہا کہ روس نے یوکرین کے فوجیوں کو لے جانے والے روسی طیارے کو مار گرائے جانے کے بعد اقوام متحدہ کی سلامتی کونسل کا ہنگامی اجلاس بلایا ہے۔ نیویارک میں اقوام متحدہ کے ہیڈکوارٹر میں ایک نیوز کانفرنس سے خطاب کرتے ہوئے، لاوروف نے کہا کہ ماسکو نے نیویارک کے وقت کے مطابق سہ پہر 3 بجے میٹنگ منعقد کرنے کی درخواست کی تھی، لیکن بظاہر اس کے مطابق میٹنگ طے نہیں کی گئی۔

لاوروف نے کہا کہ ایک روسی ٹرانسپورٹ طیارہ مار گرایا گیا جس میں 65 گرفتار یوکرین کے فوجی اہلکار سوار تھے جن میں تین روسی افسران اور عملے کے چھ ارکان شامل تھے۔ طیارے میں سوار تمام افراد یوکرین کے دہشت گردانہ حملے میں مارے گئے۔ لاوروف نے کہا کہ یوکرین کی طرف سے خارکیف کے علاقے سے داغے گئے ایک فضائی دفاعی میزائل نے طیارے کو بیلگوروڈ کے علاقے میں مار گرایا۔ روس اور یوکرین کے درمیان معاہدہ طے پانے کے بعد’ آئی ایل- 76‘ جنگی قیدیوں کے تبادلے کے لیے 65 مغوی یوکرینی فوجیوں کو ماسکو سے بیلگوروڈ لے جا رہا تھا۔

یوکرین کی سرحد سے متصل جنوبی بلغراد علاقے میں بدھ کو روسی فوجی ٹرانسپورٹ طیارہ الیوشن 76 گر کر تباہ ہونے سے عملے کے چھ ارکان سمیت 74 افراد ہلاک ہو گئے تھے۔ روسی وزارت دفاع نے کہا کہ طیارے میں یوکرین کے 65 جنگی قیدی سوار تھے جن کا تبادلہ کیا جانا تھا۔ وزارت نے بتایا کہ الیوشن 76 ٹرانسپورٹ طیارے میں عملے کے چھ ارکان اور تین دیگر افراد بھی سوار تھے۔ یوکرین کے پراودا اخبار نے ذرائع کا حوالہ دیتے ہوئے کہا تھا کہ یوکرین کی مسلح افواج نے طیارے کو مار گرایا تھا لیکن بعد میں اس رپورٹ کو واپس لے لیا۔