غزہ: اسرائیلی فضائی حملوں میں بچوں سمیت کم از کم 14 فلسطینی جاں بحق

غزہ میں اسرائیلی جارحیت میں اضافہ ہوا ہے۔ صیہونی فوج لگاتار کیمپوں، اسپتالوں اور رہائشی عمارتوں کو نشانہ بنا رہی ہے۔

دیر البلاح، غزہ کی پٹی: وسطی غزہ میں اسرائیل نے فضائی حملے کیے۔ فلسطینی محکمہ صحت کے حکام کے مطابق، ان حملوں میں بچوں سمیت کم از کم 14 افراد جاں بحق ہو گئے۔ شمالی غزہ میں ایک اسپتال پر بمباری میں نصف درجن مریض زخمی ہوئے ہیں۔

قریبی شہر دیر البلاح میں الاقصی شہداء اسپتال کے مطابق، اتوار کی سہ پہر مہاجر کیمپ میں ایک فضائی حملہ کیا گیا۔ ایک رہائشی عمارت کو ٹارگیٹ کر کے یہ حملہ کیا گیا۔ان حملوں میں چھ بچوں اور ایک خاتون سمیت کم از کم نو افراد جاں بحق ہو گئے۔

الاقصیٰ شہداء اسپتال نے بتایا کہ اس سے قبل اتوار کے روز، ایک اور اسرائیلی حملے میں نصیرات پناہ گزین کیمپ میں ایک خیمے کو نشانہ بنایا گیا، جس میں والدین اور ان کے دو بچوں سمیت کم از کم پانچ افراد ہلاک ہو گئے۔

وزارت صحت کے مطابق، شمالی غزہ میں انڈونیشیا کے اسپتال کو بمباری سے نشانہ بنایا گیا جس میں چھ مریض زخمی ہوئے ہیں، جن میں سے ایک کی حالت تشویشناک ہے۔ یہ غزہ شہر کے شمال میں سب سے بڑا اسپتال ہے۔

غزہ کی وزارت صحت نے اسپتالوں، مریضوں اور طبی عملے کے لیے بین الاقوامی تحفظ کا مطالبہ کیا ہے۔ وزارت نے اسپتالوں میں محفوظ راستہ، مزید طبی سامان، ایندھن اور زخمیوں کے محفوظ انخلاء پر بھی زور دیا ہے۔

دوسری جانب، اسرائیلی فوج نے انڈونیشیا کے اسپتال پر گزشتہ تین سے چار گھنٹوں میں کسی حملے سے لاعلمی کا اظہار کیا ہے۔

دریں اثنا، صیہونی فوج نے کہا کہ اس نے کلیدی کریم شالوم کراسنگ کو مختصر طور پر بند کر دیا ہے۔ فوج کے مطابق، جنگجوؤں کی جانب سے قریبی انسانی راہداری سے مارٹر گولے داغے گئے ہیں۔

کریم شالوم اسرائیل اور غزہ کے درمیان واحد کراسنگ ہے جو کارگو کی ترسیل کے لیے ڈیزائن کی گئی ہے اور مئی میں مصر کے ساتھ رفح کراسنگ کے بند ہونے کے بعد سے یہ امداد کے لیے اہم راستہ ہے۔ گزشتہ ماہ غزہ میں داخل ہونے والی تقریباً دو تہائی امداد کریم شالوم کے ذریعے ہی پہنچی ہے۔

غزہ میں جنگ کے آغاز کے بعد سردی کا یہ دوسرا موسم ہے۔ لاکھوں فلسطینی خیموں میں اپنی زندگی گزارنے کے لیے مجبور ہیں، اور بین الاقوامی امداد پر انحصار کر رہے ہیں۔

غزہ کی وزارت صحت کے مطابق، غزہ میں چودہ مہینوں سے جاری اسرائیلی جارحیت میں 45,600 سے زیادہ فلسطینی جان بحق ہو چکے ہیں، جن میں سے نصف سے زیادہ خواتین اور بچے ہیں۔ اسرائیلی فوج نے ثبوت فراہم کیے بغیر دعویٰ کیا ہے کہ جنگ میں 17,000 سے زیادہ حماس کے جنگجو ہلاک کئے گئے ہیں۔