کم از کم مزید کھدائی بند کردیں: صدر عارف علوی کا نتائج میں تاخیر پر ٹویٹ

الیکشن نتائج کی آمد میں تاخیر ہونے پر صدر مملکت نے سوشل میڈیا پر جاری بیان میں کہا کہ اگر ہم اپنے آپ کو گڑھے میں پائیں تو حکمت کا تقاضہ ہےکہ اللہ سے مدد مانگیں اور کم از کم مزید کھدائی بند کردیں۔

اسلام آباد: پاکستان کے صدر مملکت عارف علوی نے سوشل میڈیا پر بیان جاری کیا ہے۔ عام انتخابات 2024 کی پولنگ مکمل ہونے کے بعد نتائج آنے کا سلسلہ جاری ہے جس کے مطابق عمران خان کی پارٹی پی ٹی آئی کے حمایت یافتہ آزاد امیدوار کو برتری حاصل ہے۔

الیکشن نتائج کی آمد میں تاخیر ہونے پر صدر مملکت نے سوشل میڈیا پر جاری بیان میں کہا کہ اگر ہم اپنے آپ کو گڑھے میں پائیں تو حکمت کا تقاضہ ہےکہ اللہ سے مدد مانگیں اور کم از کم مزید کھدائی بند کردیں۔

اقوام متحدہ (یو این) کے سیکرٹری جنرل انتونیو گوٹیرس نے پاکستانی سیاست دانوں کو مشورہ دیا ہے کہ وہ ووٹوں کی گنتی کے دوران پرسکون رہیں اور صبر کا دامن نہ چھوڑیں۔ سرکاری خبر رساں ادارے ایسوسی ایٹڈ پریس آف پاکستان (اے پی پی) کے مطابق سیکرٹری جنرل انتونیو گوٹیرس نے انتخابات کے موقع پر پاکستان میں ہونے والے دہشت گردی کے واقعات پر اظہار افسوس کرتے ہوئے موبائل سروسز کی بندش پر بھی تشویش کا اظہار کیا۔

اقوام متحدہ کے سربراہ نے سرکاری خبر رساں ادارے کو بھیجی گئی اپنی ای میل میں کہا کہ وہ پاکستانی انتخابات پر گہری نظر رکھے ہوئے ہیں اور وہ ملک میں جمہوریت کی مضبوطی کے لیے پر امید ہیں۔ سیکرٹری جنرل انتونیو گوٹیرس نے تمام سیاسی رہنمائوں کو مشورہ دیا کہ وہ ووٹوں کی گنتی اور حتمی اعلان تک خود بھی پرسکون رہیں اور اپنے کارکنان کو بھی صبر کرنے کی تلقین اور ایسی کسی بھی کارروائی سے گریز کریں جو تشدد کو بڑھاوا دیتی ہو۔