حیدرآباد: وقف ترمیمی بل کے خلاف مشترکہ پارلیمانی کمیٹی (جے پی سی) کو تجاویز بھیجنے کی آخری تاریخ ہے۔ آل انڈیا مسلم پرسنل لا بورڈ کی سوشل میڈیا ڈیسک رپورٹ کے مطابق اب تک ملک بھر سے ایک کروڑ پچاس لاکھ 24 ہزار 193 تجاویز جے پی سی کو ای میل کی جا چکی ہیں اور یہ عمل مسلسل جاری ہے۔
جمعہ کے پیش نظر آل انڈیا مسلم پرسنل لا بورڈ، جماعت اسلامی ہند، جمعیت علماء ہند، امارت شرعیہ پھلواری شریف، مجلس اتحاد المسلمین اور دیگر اہم اداروں نے عوام سے بڑے پیمانے پر ای میلز بھیجنے کی اپیل کی ہے۔
بورڈ کے رکن مولانا محمود دریابادی نے ایک بیان میں کہا فی الحال یہ نہ سوچیں کہ آر ایس ایس یا ہندتوا وادی کیا کر رہے ہیں، بلکہ صرف اپنے ہدف پر نظر رکھیں۔ ہمیں 13 ستمبر کی رات 12 بجے تک دو کروڑ ای میلز تک پہنچنا ہے۔
آل انڈیا مسلم پرسنل لا بورڈ کے سکریٹری اور بورڈ کے سوشل میڈیا ڈیسک کے سربراہ مولانا عمرین محفوظ رحمانی نے کہا کہ کل جمعہ کا دن ہے بڑی تعداد میں مسلمان مسجدوں میں آتے ہیں، جمعہ کا دن ہماری قوت ہے جو کسی اور قوم کے پاس نہیں ہے، ہمیں اس کا بھرپور استعمال کرنا چاہیے۔ تمام ائمہ مساجد، علمائے کرام، خطباء، متولین مساجد سے گزارش ہے کہ سبھی مساجد میں اس موضوع کے تحت خطبہ دیں اور مسلم پرسنل لا بورڈ کے کیو آر کوڈ کو مساجد میں چسپاں کیا جائے اور وہاں لوگوں کو اس بات کی ترغیب دی جائے کہ ای میل کریں۔ وقف ترمیمی بل کی مخالفت میں ہمیں اپنی آواز بلند رکھنی چاہیے، آل انڈیا مسلم پرسنل لا بورڈ اس سلسلے میں کوشاں ہے، ان شاءاللہ اللہ کی ذات سے امید ہے کہ کوششیں رنگ لائیں گی۔
قابل ذکر ہے کہ 13 ستمبر آخری تاریخ ہے، ان شاء اللہ جدوجہد کا سلسلہ جاری رہے گا اور کوششیں کی جاتی رہیں گی۔ جمعہ کے دن خصوصی دعاؤں کا بھی اہتمام کریں، اللہ تعالی ہمارے ملک میں رہنے والے مسلمانوں کو عزت وعافیت عطاء فرمائے، ملک کو ہر شر سے، نفرت انگیزی سے، فرقہ واریت سے محفوظ رکھے۔
غور طلب ہے کہ نیچے آل انڈیا مسلم پرسنل لا بورڈ کا کیو آر کوڈ فوٹو کی شکل میں دستیاب ہے، جس کے ذریعے آپ اپنی تجاویز 13 ستمبر کی شب 12 بجے تک بھیج سکتے ہیں، تاکہ وقف کی حفاظت کے لیے آپ بھی اپنا کردار ادا کرسکیں۔