کانگریس کی قومی جنرل سکریٹری پرینکا گاندھی کے شوہر رابرٹ واڈرا لکھنؤ: جیسے جیسے لوک سبھا الیکشن کی تاریخ قریب آتی جارہی ہے ویسے ویسے ملک میں اس بات کو لے کر بحث بھی تیز ہوتی جارہی ہے کہ ملک کی دو سب سے ہائی پروفائل سیٹیں، اتر پردیش کی رائے بریلی اور امیٹھی سے کون امیدوار ہوگا۔ اسی دوران پرینکا گاندھی کے شوہر رابرٹ واڈرا نے امیٹھی لوک سبھا سیٹ سے الیکشن لڑنے کی خواہش ظاہر کی ہے۔
اپنے جاری کردہ بیان میں رابرٹ واڈرا نے کہا کہ لوگ چاہتے ہیں کہ میں سیاست میں آؤں۔ اگر مجھے موقع ملا تو میں امیٹھی کے لوگوں کے درمیان جانا چاہوں گا اور ان کے لیے کام کروں گا۔ میں نے پرینکا گاندھی کے ساتھ مل کر پہلی بار 1999 میں امیٹھی میں انتخابی مہم شروع کی تھی۔ تب سے میں امیٹھی، رائے بریلی، جگدیش پور اور سلطان پور میں مسلسل سرگرم ہوں۔ آج بھی امیٹھی کے لوگوں کے جذبات مجھ سے جڑے ہوئے ہیں۔ لوگ تیج کے تہوار پر میری سالگرہ پر مجھ سے رابطہ کرتے ہیں۔
عوام کی خواہشات کے مطابق اگر میں سیاست میں پہلا قدم رکھتا ہوں اور ایم پی بننے کا سوچتا ہوں تو مجھے صرف امیٹھی کی نمائندگی کرنی چاہیے۔ رابرٹ واڈرا کے اس بیان کے بعد اتر پردیش کے سیاسی حلقوں میں ان کے امیٹھی سے الیکشن لڑنے کی باتیں شروع ہو گئی ہیں۔
خبر رساں ایجنسی اے این آئی کو دیئے گئے ایک بیان میں، رابرٹ نے کہا کہ میں یقینی طور پر امیٹھی اور رائے بریلی کے لوگوں کو یہ دیکھنا چاہوں گا کہ جو بھی ان کی نمائندگی کرے وہ صرف ان کی ترقی کے بارے میں بات کرے۔ ان کی بھلائی اور سلامتی کی بات کریں اور تعصب کی سیاست نہ کریں، کیونکہ امیٹھی کے لوگ وہاں کے موجودہ ممبران پارلیمنٹ سے بہت ناراض ہیں۔
انھوں نے یہ بھی کہا کہ امیٹھی کی موجودہ ایم پی وہاں کسی بھی ترقی کے کاموں کے بارے میں نہیں سوچ رہی ہیں، وہ صرف یہ دیکھنے کی کوشش کر رہی ہیں کہ گاندھی خاندان کے خلاف کوئی بھی بنیادی سوال کیسے اٹھایا جا سکتا ہے اور صرف شور مچائیں اور اپنے عہدے کا غلط استعمال کریں، میں دیکھ رہا ہوں کہ وہ زیادہ تر اسی میں مصروف ہیں اور کیونکہ گاندھی خاندان نے برسوں سے امیٹھی، رائے بریلی، سلطان پور، جگدیش پور اور ان تمام علاقوں میں سخت محنت کی ہے۔
واڈرا نے کہا کہ میں پھر کہوں گا کہ جب امیٹھی کے لوگوں کو لگتا ہے کہ انہوں نے اسمرتی جی کو ایم پی بنا کر غلطی کی ہے اور راہل کو کوئی دوسرا حلقہ تلاش کرنا پڑا تو جو بھی ہو، مجھے لگتا ہے کہ وہ چاہتے ہیں کہ گاندھی خاندان کا کوئی بھی فرد واپس آجائے جسے وہ بھاری اکثریت سے جیتائیں گے۔
یہ بھی پڑھیں: راہل گاندھی نے وائناڈ سے پرچہ نامزدگی داخل کیا، روڈ شو میں ہزاروں لوگوں کی شرکت
