Telangana Bangaru Bonam to Kanaka Durga Temple: ఇంద్రకీలాద్రి అమ్మవారికి తెలంగాణ భక్తుల బంగారు బోనం..

Telangana Devotees Offer Golden Bonam to Kanaka Durga: విజయవాడ ఇంద్రకీలాద్రిపై వెలసిన కనకదుర్గమ్మకు తెలంగాణ రాష్ట్రం నుంచి వచ్చిన భక్తులు.. బంగారు బోనం సమర్పించారు. దుర్గమ్మకు పట్టు వస్త్రాలు తీసుకుని.. తలపై బంగారు బోనం పెట్టుకుని ప్రదర్శనగా బ్రాహ్మణ వీధి నుంచి ఇంద్రకీలాద్రికి చేరుకున్నారు. జమ్మిదొడ్డి వద్ద పూజా కార్యక్రమంలో పాల్గొన్న అనంతరం.. జోగిని విశా క్రాంతి అమ్మవారికి తొలి బంగారు బోనం సమర్పించారు. అమ్మవారికి బంగారు బోనం, పట్టు వస్త్రాలు, వడిబియ్యంతో పాటు కృష్ణమ్మ తల్లికి పట్టువస్త్రాలు, పసుపు కుంకుమ, గంగతెప్పను సమర్పించారు. హైదరాబాద్‌ భాగ్యనగర్ శ్రీ మహంకాళి బోనాల జాతర ఉమ్మడి దేవాలయాల ఊరేగింపు కమిటీ ఆధ్వర్యంలో ఈ కార్యక్రమాన్ని అంగరంగ వైభవంగా నిర్వహించారు. హైదరాబాద్ పాత బస్తీకి చెందిన ప్రజలు విజయవాడ వన్ టౌన్​లోని  జమ్మిదొడ్డి వద్ద అమ్మవారికి ప్రత్యేక పూజలు నిర్వహించారు. బంగారు బోనంలో నైవేద్యం సిద్ధం చేసి అందంగా అలంకరించారు. ప్రతి ఏడాది ఆషాఢ మాసంలో బెజవాడ కనకదుర్గమ్మకు బంగారు బోనం సమర్పించడం ఆనవాయితీగా వస్తోంది. 14 ఏళ్లుగా ఈ ఆచారాన్ని నిర్వహిస్తున్నారు. బోనం సమర్పణ కార్యక్రమంలో భాగంగా తెలంగాణ కళాకారుల ప్రదర్శన ప్రత్యేక ఆకర్షణగా నిలుస్తోంది. వందల సంఖ్యలో కళాకారులు తరలివచ్చి.. ప్రత్యేక వేషధారణతో అమ్మవారి పట్ల తమకున్న భక్తిప్రపత్తులను చాటుకున్నారు. మేళతాళాలు, డప్పులు, తీన్‌మార్‌ స్టెప్పులు, పోతురాజుల విన్యాసాలు, కోలాటాలు, బేతాళ నృత్యాలు, విచిత్ర వేషధారణలు ఈ ప్రదర్శనకు మరింత ప్రత్యేక ఆకర్షణను ఇచ్చాయి. దుర్గామల్లేశ్వరస్వామి దేవస్థానం తరఫున ఆలయ ఈవో ధర్బముళ్ల భ్రమరాంబ, స్థానాచార్యులు విష్ణుబొట్ల శివప్రసాదశర్మ, ఇతర అధికారులు, ఉత్సవ కమిటీ ప్రతినిధులు.. కళాకారులకు సాదర స్వాగతం పలికారు. ఉభయ తెలుగు రాష్ట్రాలలో వర్షాలు విస్తారంగా కురిసి.. పాడి పంటలతో రైతులు, అన్ని వర్గాల ప్రజలు సుఖ సంతోషాలతో ఉండాలని.. ఆంధ్ర, తెలంగాణ రాష్ట్ర ప్రజలు కలిసిమెలసి ముందుకు సాగాలని అమ్మవారిని వేడుకున్నట్లు బోనాల ఉత్సవ కమిటీ ప్రతినిధులు తెలిపారు.