Silencers Destroy in Warangal : బైక్​ సైలెన్సర్లు ధ్వంసం చేసిన ట్రాఫిక్​ పోలీసులు.. ఇకపై సౌండ్​ చేస్తే కఠిన చర్యలు తప్పవు - traffic police action on bikes

Silencers Destroy in Warangal : ప్రభుత్వ నిబంధనలకు విరుద్ధంగా ద్విచక్ర వాహనాల కంపెనీ సైలెన్సర్ స్థానంలో అధిక శబ్ధం చేసే సైలెన్సర్లను హనుమకొండ కేయూ క్రాస్ రోడ్డు వద్ద రోడ్ రోలర్​తో ట్రాఫిక్ పోలీసులు ధ్వంసం చేసారు. వరంగల్ పోలీస్ కమిషనర్ రంగనాథ్ అదేశాల మేరకు అధిక శబ్దం వచ్చే సైలెన్సర్ల ఏర్పాటుపై ట్రాఫిక్ పోలీసులు ఉక్కుపాదం మోపారు. వరంగల్​ కమిషనరేట్ ట్రాఫిక్ ఏసీపీ భోజరాజు తెలిపిన వివరాల ప్రకారం.. ట్రై సిటీ పరిధిలో కొన్ని రోజులుగా ద్విచక్ర వాహనాలపై ప్రత్యేక దృష్టి పెట్టారు. దీనిలో భాగంలో అధిక శబ్ధం వచ్చే ద్విచక్ర వాహనాలను గుర్తించి.. వాటి సైలెన్సర్​లను ట్రాఫిక్​ పోలీసులు తొలగించారు. వాటినన్నింటిని మరోసారి వినియోగించకుండా రోడ్​ రోలర్​తో ధ్వంసం చేశారు. సుమారు రెండు వందలకు పైగా సైలెన్సర్లను(Destroying Silencers) తొక్కించారు. అందులో హనుమకొండకి చెందినవి 70, కాజీపేట 65, వరంగల్​ 65 ఉన్నాయని తెలిపారు. అధిక శబ్ధాలు వచ్చే సైలెన్సర్ల వల్ల ప్రజారోగ్యం దెబ్బతింటుందని పేర్కొన్నారు. ద్విచక్ర వాహనదారులు కంపెనీతో వచ్చిన సైలెన్సర్లను ఎలాంటి మార్పు చేసినా.. వాహనదారుడితో పాటు మార్పు చేసిన మెకానిక్​లపై క్రిమినల్​ చర్యలు తీసుకుంటామని ఆయన హెచ్చరించారు.