Cool Drink Shop Owner Variety Flexi in Yadadri Bhuvanagiri : మద్యం ప్రియుల తాకిడి తట్టుకోలేక.. ఏకంగా ఓ కూల్ డ్రింక్ షాపు యజమాని తన దుకాణం ముందు వింతగా ఫ్లెక్సీ పెట్టాడు. అందులో 'ఇది బెల్ట్ షాపు కాదు. ఇక్కడ మద్యం విక్రయించరు' అని రాశాడు. ఈ విషయం జిల్లా వ్యాప్తంగా చర్చనీయాంశమైంది. యాదాద్రి భువనగిరి జిల్లా మోత్కూరు మండల కేంద్రంలో నాలుగు మద్యం దుకాణాలు ఉన్నాయి. ప్రభుత్వం అనుమతి లేకున్నా.. పట్టణంలోని చెరువుకట్ట, బస్టాండ్ తదితరి ప్రాంతాల్లో విచ్చలవిడిగా బెల్ట్ షాపులను నడుపుతున్నారు. కూల్ డ్రింక్, చిన్న చిన్న కిరాణ దుకాణాలు వాటికిి అడ్డాగా మారాయి. ఈ షాపులపై స్థానికులు ఎన్నిసార్లు ఫిర్యాదులు చేసినా అబ్కారీ శాఖ అధికారులు పట్టించకోలేదన్న ఆరోపణలు ఉన్నాయని పట్టణవాసులు చెబుతున్నారు.
ఈ క్రమంలోనే నగరంలో ఓ కూల్ డ్రింక్ షాపునకు తరచుగా మద్యం ప్రియులు వచ్చి మద్యం దొరుకుతుందా అని అడుగుతున్నందున ఆ యజమాని విసిగిపోయి.. తన షాపు ముందు ఈ ఫ్లెక్సీని పెట్టుకున్నాడు. ఇకనైనా అబ్కారీ శాఖ వారు స్పందించి మద్యంపై సరైన నియంత్రణ తీసుకురావాలని స్థానికులు కోరుతున్నారు.