Dharna on SI rude behaviour : సీటు విషయంలో గొడవ... చివరికి ధర్నాకు దారితీసింది.. - ఎస్సై ప్రవర్తనపై ధర్నా

Dharna on SI rude behaviour : ఆర్టీసీ బస్సు ఆపి ఓ మహిళా ప్రయాణికురాలిపై జగిత్యాల రూరల్‌ ఎస్సై అనిల్ దాడి చేశాడని అతనిపై చర్యలు తీసుకోవాలని డిమాండ్ చేస్తూ పట్టణంలో యువకులు ఆందోళనకు దిగారు. ఉదయం నుంచి సాయంత్రం వరకు ఘర్షణ కొనసాగింది. ఒక దశలో యువకులు జగిత్యాల పోలీస్​ స్టేషన్​ వైపు పరుగెత్తడం వారిని పోలీసులు అడ్డుకునే ప్రయత్నం చేశారు. ఓ సమయంలో పరిస్థితులు చేజారిపోయాయి. పోలీసులు సమన్వయం పాటిస్తూ యువకులను శాంతింపజేసే ప్రయత్నం చేశారు. 
మహిళపై చేయిచేసుకున్న ఎస్సై:  కరీంనగర్‌ నుంచి జగిత్యాల వెళ్తున్న బస్సులో జగిత్యాల రూరల్‌ ఎస్సై అనిల్‌ భార్యకు, మహిళా ప్రయాణికురాలి మధ్య బస్సు సీటు విషయంలో గొడవ జరిగింది. ఈ క్రమంలో జగిత్యాలకు రాగానే బస్సు ఆపిన ఎస్సై మహిళా ప్రయాణికురాలిపై చేయిచేసుకున్నాడు. ఈ గొడవ కాస్త చినికి చినికి గాలి వానల మారింది. జగిత్యాల జిల్లా వ్యాప్తంగా ఆందోళనలు కొనసాగాయి. ఎస్సైపై కేసు నమోదు చేసిన పోలీసులు ఘటనపై విచారణ జరుపుతున్నారు.