దావోస్​కు వెళ్తే డబ్బులు దండగా అన్న కాంగ్రెస్ నేతలు ఇప్పుడు ఎందుకు వెళ్లారు : హరీశ్​రావు

BRS MLA Harish Rao On Lok Sabha Elections : కేటీఆర్ అప్పట్లో దావోస్​కు వెళ్తే డబ్బులు దండగా అన్న కాంగ్రెస్ నేతలు ఇప్పుడు ఎందుకు వెళ్లారో సమాధానం చెప్పాలని మంత్రి హరీష్​రావు డిమాండ్​ చేశారు. సిద్దిపేట జిల్లా గజ్వేల్​లో నిర్వహించిన బీఆర్ఎస్ కృతజ్ఞత సభలో ఆయన ముఖ్య అతిథిగా పాల్గొన్నారు. ఈ సందర్భంగా మాట్లాడిన ఆయన రాహుల్​గాంధీ బస్సుయాత్రలో మాట్లాడుతూ ఈ దేశం ఇద్దరి చేతుల్లో ఉందని, అదానీ, అంబానీలు అవినీతిపరులన్నారని తెలిపారు. ఈ ఇద్దరి వ్యక్తుల మధ్య 500 కంపెనీలు ఉన్నాయని వారి అవినీతి వెనుక ప్రధాని ఉన్నారంటూ రాహుల్​ అన్న వ్యాఖ్యలను హరీష్​రావు గుర్తు చేశారు. వారు అలా మాట్లాడుతుంటే సీఎం రేవంత్​రెడ్డి మాత్రం వాళ్ల దగ్గరికి వెళ్లి ఆలింగనం చేసుకుంటున్నారని, ఇద్దరిలో ఎవరి మాటలు నమ్మాలో చెప్పాలన్నారు.

ఈరోజు మతతత్వ పార్టీ అయినా బీజేపీపై పోరాటం చేసింది, రాష్ట్రాన్ని అభివృద్ధి మార్గంలో ముందుకు తీసుకుపోయింది బీఆర్ఎస్​ అన్నారు. కాంగ్రెస్​ నేతలు బీజేపీతో కొట్లాడుతామని, కానీ పాలమూరుకు జాతీయ హోదా కల్పించారని కేంద్ర మంత్రిని కోరితే వాళ్లు ఇవ్వమని చెప్పారు, మరి ఎక్కడ కొట్లాడుతున్నారని ప్రశ్నించారు. వారికి పూలదండలు వేయడంలో కాంగ్రెస్ నేతలు కొట్లాడుతున్నారని ఎద్దేవా చేశారు. రాబోయే పార్లమెంటు ఎన్నికల్లో మెదక్​ ఎంపీ స్థానాన్ని అత్యధిక మెజార్టీతో గెలిపించుకోవాలని ఈ సందర్భంగా కార్యకర్తలకు సూచించారు. కేసీఆర్ నడక ప్రారంభించారని మరో 15 రోజుల్లో ఆయన ఆరోగ్యం కుదుట పడగానే గజ్వేల్ ప్రజలకు అందుబాటులోకి వస్తారని తెలిపారు. కార్యకర్తలకు ఎలాంటి ఆపద వచ్చినా తాను 24గంటలు అందుబాటులో ఉంటానంటూ వారికి భరోసా ఇచ్చారు.