BJP MP Laxman Fires on KTR : "కేటీఆర్​ స్థాయికి మించి మాట్లాడుతున్నారు"

BJP MP Laxman Fires on KTR :రాష్ట్ర పరిస్థితి గురించి బీజేపీ అగ్రనేతలు వాస్తవాలు మాట్లాడుతున్నారనే అక్కసుతో.. కేటీఆర్ సంస్కారం లేకుండా నోటికి వచ్చినట్టు మాట్లాడుతున్నారని బీజేపీ నేత, రాజ్యసభ సభ్యుడు లక్ష్మణ్​ విమర్శించారు. పెద్దవారిని దూషిస్తే.. బడానేతగా మారొచ్చని కేటీఆర్ అనుకుంటున్నారని మండిపడ్డారు. సీఎం కాలేననే ఫ్రస్ట్రేషన్​లో స్థాయిని మించి మాట్లాడుతున్నారని దుయ్యబట్టారు. ప్రస్తుతం తెలంగాణలో బీఆర్​ఎస్​ నాయకుల కాళ్ల కింద పీఠాలు కదులుతున్నాయని ధ్వజమెత్తారు. 

BJP MP Laxman Comments on KTR : మోదీ, అమిత్ షా వంటి అగ్రనాయకుల స్థాయి ఎక్కడ.. కేటీఆర్ నీ స్థాయి ఎక్కడ అని లక్ష్మణ్​ ఎద్దేవా చేశారు.  రాష్ట్రంలో బీఆర్​ఎస్​ వ్యతిరేక పవనాలు వీస్తున్నాయని దుయ్యబట్టారు. ప్రజలకు పథకాల పేరుతో.. ఒక రూపాయి ఇచ్చి పది రూపాయలు గుంజుతున్నారని దుయ్యబట్టారు. నదులకు నడక నేర్పడం ఏమో కానీ.. రాష్ట్రంలో మద్యాన్ని ఏరులై పారించారని విమర్శించారు. బీఆర్​ఎస్ ప్రభుత్వం కేంద్ర ప్రభుత్వానికి సహకరించకుండా తెలంగాణ అభివృద్దిని అడ్డుకుంటున్నారని మండిపడ్డారు. తెలంగాణ ఎన్నికలు అంటే మద్యం, డబ్బు విచ్చలవిడిగా ఖర్చు చేయడం అయిపోయిందని.. కాంగ్రెస్, బీఆర్​ఎస్​, మజ్లిస్ పార్టీలు అవకాశవాద రాజకీయాలకు పాల్పడుతున్నాయని మండిపడ్డారు. ఈ నెల 16 తర్వాత బీజేపీ అభ్యర్థుల జాబితా కూడా వస్తుందిని.. నోటిఫికేషన్​లోపే మానిఫేస్టో విడుదల చేస్తామని స్పష్టం చేశారు.