Ram Charan Baby Name : 'మా పాప పేరేంటో ముందే నిర్ణయించుకున్నాం' - telangana latest news

Upasana Discharged from Apollo Hospital : అనుకున్న సమయానికి దేవుడు తమకు పాపను ఇచ్చి ఆశీర్వదించాడని మెగా పవర్​స్టార్​ రామ్​చరణ్​ హర్షం వ్యక్తం చేశారు. ఈ నెల 20న ఉపాసన అపోలో ఆస్పత్రిలో పాపకు జన్మనిచ్చింది. నేడు ఆస్పత్రి నుంచి పాపతో కలిసి డిశ్ఛార్జీ అయ్యింది. ఈ సందర్భంగా తల్లీబిడ్డలతో కలిసి మీడియా ముందుకు వచ్చిన రామ్​చరణ్.. తన ఆనందాన్ని వ్యక్తం చేస్తూ ఉపాసన, పాపకు వైద్యం అందించిన వైద్యులకు పేరు పేరునా ధన్యవాదాలు తెలిపారు. ఇద్దరూ ఎలాంటి ఇబ్బంది లేకుండా చక్కగా ఉన్నారన్న రామ్​చరణ్.. అభిమానుల ఆశీస్సులు తమ పాపకు ఉండాలని కోరుకుంటున్నట్లు తెలిపారు. 

అయితే పాపకు ఏ పేరు పెట్టాలనేది తాను, ఉపాసన నిర్ణయించుకున్నామని.. 21వ రోజు స్వయంగా ప్రకటిస్తానని రామ్​చరణ్ వెల్లడించారు. పాపతో కలిసి రామ్ చరణ్, ఉపాసన హాస్పిటల్ నుంచి బయటికి రావడంతో అభిమానులు గులాబీల వర్షం కురిపించారు. అనంతరం అక్కడి నుంచి నేరుగా మొయినాబాద్​లోని ఉపాసన పుట్టింటికి బయల్దేరి వెళ్లారు.