శరీరంలో అతి ముఖ్యమైన అవయవం మెదడు. ఇది ఆరోగ్యంగా ఉంటేనే మిగతా జీవక్రియలన్నీ సవ్యంగా జరుగుతాయి. మరి ఆ మెదడు (Memory Tips For Students) ఆరోగ్యంగా ఉండాలంటే బాల్యం నుంచి అందే పోషకాహారమే కీలకం అంటున్నారు వైద్యులు.
చిన్నప్పటి నుంచి..
స్కూల్‌ స్థాయికి చేరుకోకముందు నుంచే పిల్లలకు సరైన పోషకాలు అందాలి. లేదంటే వారి జీవన నైపుణ్యాలు కుంటుపడే ప్రమాదం ఉంది. ఏకాగ్రతా కొరవడుతుంది. చదువులోనూ ముందడుగు వేయలేరు. అందుకే చేప, బ్రకోలీ, బెర్రీలు వంటివి వారి ఆహారంలో చేర్చాలి. వీటివల్ల జ్ఞాపకశక్తి పెరుగుతుంది. అధిక చక్కెర, చెడు కొలెస్ట్రాల్‌కు పిల్లలను దూరంగా ఉంచాలి. లేదంటే అధికబరువుకు కారణమై, పలురకాల అనారోగ్యాలకు గురిచేస్తాయి. దేనిపైనా ఏకాగ్రత వహించలేరు.
మానసికంగా..
చక్కటి పోషకాహారం అందిన చిన్నారులు మానసికంగానూ ఉత్సాహంగా ఉంటారని పలు అధ్యయనాలు చెబుతున్నాయి. ఉత్సాహంగా ఉండే పిల్లలు క్రీడలపై ఆసక్తిని పెంచుకుంటారు. ఇది వారిని శారీరకంగా దృఢంగా ఉంచుతుంది. వారి మెదడు కూడా ప్రభావితమై హుషారుగా, శక్తి మంతులుగా ఉంటారు. చదువులోనూ ముందుండి, సరైన లక్ష్యాలను ఏర్పరుచుకుని సాధించడానికి కృషి చేస్తారు. పోషకాహార లోపమున్న పిల్లల్లో ఆ ఉత్సాహం ఉండదు. మానసికంగా పలు రుగ్మతలకు గురవుతూ ఉంటారు. దీంతో వారి భవిష్యత్తు ఒడుదొడుకులకు గురయ్యే ప్రమాదం ఉంది.