రోజూ ఒక గుడ్డు ఎందుకు తినాలంటే.?

కరోనా కాలంలో రోగనిరోధక శక్తి పెంచుకోవడానికి ప్రాధాన్యం ఏర్పడింది. ప్రతి ఒక్కరూ పౌష్టికాహారం తీసుకునేందుకు ప్రయత్నిస్తున్నారు. ఇందులో ముఖ్యంగా బహుళ పోషకాలకు నిలయమైన కోడిగుడ్డును తీసుకుంటే అనేక ప్రయోజనాలు చేకూరనున్నాయి.

గుడ్డు పోషకాల నిలయం. ఇందులో మాంసకృత్తులు(ప్రొటీన్‌), అత్యవసరమైన 9 అమైనో ఆమ్లాలు, బి-కాంప్లెక్స్‌ విటమిన్లు, డి-విటమిన్‌, ఖనిజాలు పుష్కలంగా ఉంటాయి. గుడ్డు తింటే బరువు పెరుగుతుందని చాలామంది భావిస్తుంటారు. దీనికి కారణం పచ్చసొనలోని కొలెస్ట్రాలే.

అయితే.. కోడిగుడ్డులో కొలెస్ట్రాల్‌ స్థాయులు ఎక్కువగా ఉన్నప్పటికీ.. రక్తంలో కొలెస్ట్రాల్‌ మోతాదులు అంత ఎక్కువగా ఏమీ పెరగటం లేదని అధ్యయనాలు చెబుతున్నాయి. ఇందులో కేలరీలు తక్కువ. పైగా చాలాసేపటి వరకు కడుపు నిండిన భావన కలిగిస్తుంది. ఫలితంగా త్వరగా ఆకలి వేయదు. ఇలా ఇది పరోక్షంగా బరువు తగ్గటానికీ తోడ్పడుతుందన్నమాట.

ప్రయోజనాలివీ..

• కణాల పనితీరు, వాటి ఎదుగుదల, శక్తిని అందించటం సహా.. శరీరంలో జరిగే పలు జీవక్రియలకు అవసరమైన పోషకాలు గుడ్డుతో లభిస్తాయి.
• గుడ్డులోని పచ్చసొనలో ఉండే ఐరన్‌ మన శరీరం తేలికగా గ్రహించటానికి అనువుగానూ ఉంటుంది.
• గుడ్డులోని ల్యూటీన్‌ అనే యాంటీ ఆక్సిడెంటు.. కంటి జబ్బుల ముప్పు తగ్గటానికి తోడ్పడుతుంది. వృద్ధాప్యంలో మెదడు ఆరోగ్యంగా ఉండటానికీ ఇది దోహదం చేస్తుంది.
• రోజుకు ఒక గుడ్డు తినేవారిలో పక్షవాతం ముప్పు 12 శాతం వరకు తగ్గుతున్నట్టు ఒక పరిశోధనలో వెల్లడైంది.

ఇదీ చదవండి:కాఫీతో లాభాలే కాదు.. నష్టాలూ ఉన్నాయండోయ్​!