అమృతజలం...కొబ్బరిసలిలం!.. ఆరోగ్యం పదిలం.!

ఎండాకాలం వచ్చిందంటే చాలు కొబ్బరి బొండాలకు అధికంగా డిమాండ్ ఉంటుంది. శరీరానికి తక్షణ శక్తినివ్వడంతో పాటు ఉపశమనం కలిగిస్తుంది. అంతే కాదండోయ్ ఆరోగ్యానికి అన్ని రకాల అవసరమైన విటమిన్లు అందిస్తాయి. కొబ్బరి నీళ్లతో కిడ్నీలో రాళ్లు ఏర్పడకుండా అడ్డుకోవచ్చు. అలాగే గుండెపోటును నియంత్రించడంలో ఉపయోగపడతాయి. ఆరోగ్యానికి వాటి అవసరం ఎంత ఉందో ఒకసారి పరిశీలిద్దాం.

కొబ్బరి నీళ్లలో సోడియం, పొటాషియం, మెగ్నీషియం, మాంగనీస్‌, ఫాస్ఫరస్‌, కాల్షియం, విటమిన్‌-సి లాంటి బోలెడు పోషకాలుంటాయి. అలాగే తక్కువ మొత్తంలో పిండిపదార్థాలు, పీచూ కూడా. ఈ నీళ్లను తాగడం వల్ల కిడ్నీల్లో రాళ్లు ఏర్పడటాన్ని తగ్గించుకోవచ్చు. గుండె ఆరోగ్యానికి చాలా మంచివి. తాజా కొబ్బరినీళ్లను తరచూ తీసుకోవడం వల్ల రక్తపోటు నియంత్రణలో ఉంటుంది.

ఆరోగ్యానికి ఐదు లాభాలు..

* వ్యాయామం చేసిన తర్వాత తీసుకుంటే శరీరానికి తక్షణ శక్తితోపాటు పోషకాలూ అందుతాయి. ఎండాకాలం అధిక ఉష్ణోగ్రతల వల్ల శరీరం కోల్పోయిన నీటిని కొబ్బరి బొండం రూపంలో అందిస్తే డీహైడ్రేషన్‌ సమస్య ఉండదు.

* బరువు తగ్గాలనుకునేవారికి ఈ నీళ్లు చక్కటి ఎంపిక. ఈ నీటిలో చక్కెరలు, కెలొరీలు తక్కువ కాబట్టి తాగినా బరువు పెరగరు.

* ఈ నీటిని తాగడం వల్ల కడుపు నిండిన భావన కలిగి త్వరగా ఆకలి వేయదు. ఇందులోని పీచు బరువు తగ్గడానికి తోడ్పడుతుంది.

* ఈ నీళ్లలోని పోషకాలు రక్తంలోని కొలెస్ట్రాల్‌ స్థాయులను నియంత్రిస్తాయి. తరచూ తీసుకుంటే రోగనిరోధక శక్తి పెరుగుతుంది.

* వాంతులు, విరోచనాలు అవుతున్నప్పుడు కొబ్బరినీళ్లు తీసుకుంటే ఉపశమనంగా ఉంటుంది. ఈ నీటిని తరచూ తీసుకుంటే మూత్ర సంబంధ సమస్యలు తగ్గిపోతాయి.

ఇదీ చూడండి:వచ్చే ఏడాది మేడారం జాతర తేదీలు ఖరారు